न्यूयोर्क । एक थान गोल्ड बारको मूल्य १० लाख डलर पर्ने भएको छ । बहुमूल्य धातु सुनको भाउ बढेसँगै पहिलो पटक गोल्ड बारको भाउ १० लाख डलरमा पुगेको हो ।

शुक्रबार अन्तर्राष्ट्रिय बजारमा स्पट गोल्डको भाउ पहिलो पटक प्रतिऔंस २ हजार ५०० डलरमाथि उक्लिएको थियो । सुनको भाउले यो स्तर पार गरेको यो नै पहिलो पटक थियो । गोल्ड बारको औसत तौल ४०० औंस हुन्छ । यसरी सरसर्ती हिसाब गर्दा पनि एक थान गोल्ड बारको मूल्य १० लाख डलर बढी पर्ने देखिन्छ ।

यो वर्ष शुरु भएयता स्पट गोल्डको भाउ २० प्रतिशतभन्दा धेरैले बढिसकेको छ । गत वर्षको यही अवधिको तुलनामा सुन ३२ प्रतिशतभन्दा धेरै महँगिइसकेको छ । मंगलबार न्यूयोर्क मर्कन्टाइल एक्सचेञ्जको कोमेक्स डिभिजनमा स्पट गोल्डको भाउ अधिकतम २ हजार ५२४ डलर ९८ सेन्टसम्म पुगेको थियो ।यो समाचार तयार पार्दाखेरि स्पट गोल्ड प्रतिऔंस २ हजार ५२२ डलर ५२ सेन्टमा किनबेच भइरहेको थियो । यो अघिल्लो दिन बजार बन्द हुँदाको तुलनामा शून्य दशमलव ७६ प्रतिशत बढी थियो ।एजेन्सी