काठमाडौं । इसेवा पुनः प्ले स्टोरमा उपलब्ध भएको छ । यसअघि, गुगलले प्ले स्टोरमा इसेवा अस्थाई समयको लागि अनुपलब्ध गराएको थियो । गुगल र डुन्सको कार्य प्रक्रिया भइरहदा इसेवा, गुगल प्ले स्टोरमा अनुपलब्ध रहेको र यो कुनै सुरक्षा कमजोरी वा सुरक्षा सम्बन्धी समस्याले नभएको कम्पनीकाे ठहर छ।

इसेवाले एक विज्ञप्ति जारी गर्दै नाम परिवर्तन प्रक्रिया भइरहँदा गुगलको सिस्टममा भएको र डुन्स नम्बरमा भएको विवरण भिन्न देखिएकोले गुगलले प्ले स्टोरमा अस्थाई समयको लागि अनुपलब्ध गराएको स्पष्ट पारेकाे छ ।

उक्त विज्ञप्तीमा लेखिएकाे छ,”गुगलले बिजनेस तथा संस्था भेरिफाइ गर्न डुन्स (DUNS) नम्बर प्रयोग गर्छ, जुन डुन एन्ड ब्राडस्ट्रिट नामक अमेरिकन कम्पनीले उपलब्ध गराउँछ । नाम परिवर्तन प्रक्रिया भइरहँदा गुगलको सिस्टममा भएको र डुन्स नम्बरमा भएको विवरण भिन्न देखिएकोले गुगलले प्ले स्टोरमा अस्थाई समयको लागि अनुपलब्ध गराएको थियो । अहिले सो प्रक्रिया पूरा भइसकेकोले पुनः प्ले स्टोरमा उपलब्ध भइसेकेको छ ।”

यसका साथै, नेपालकै पहिलो मोबाइल वालेट इसेवाले विगत केही वर्षयता गुगलले प्रयोगकर्ताहरूको सुरक्षा र अनुभवमा सुधार ल्याएको लागि नयाँ नीति जारी गरेको र उक्त नीति अनुरूप डेभलपरले उपलब्ध गराएको विवरण तथा अकाउन्टमा कुनै भिन्नता देखिए गुगलले प्ले स्टोरबाट डेभलपर प्रोफाइल र त्यसमा रहेका एपहरु हटाउने गर्दै आइरहेको जानकारी दिएकाे छ । गुगल प्ले स्टोरमा एप पब्लिस गर्ने सबैले आफ्नो अकाउन्ट भेरिफाइ गर्नुपर्ने पनि इसेवाले जनाएकाे छ ।

“इसेवाको हकमा भने अकाउन्ट इसेवा प्राइभेट लिमिटेडको नामले भेरिफाइड रहेको थियो तर केही समय अगाडि कम्पनी प्राइभेट लिमिटेडबाट लिमिटेडमा परिवर्तन भएको हुनाले गुगल प्ले स्टोरमा नाम परिवर्तन हुने क्रममा रहेको थियो,”इसेवाले उल्लेख गरेकाे छ ।

यसैगरी, इसेवाको स्थापना भएको बेला गुगल डेभलपर अकाउन्ट बनाउँदा कम्पनी प्रा. लि. रहेको र गत वैशाख २८, २०८१ देखि भने कम्पनी लिमिटेडमा रूपान्तरण भएकोले यही नाम परिवर्तनको मामिलाले इसेवाको बिजनेस भेरिफिकेसनमा कठिनाइ उत्पन्न भएको इसेवाले प्रस्टाएकाे छ ।

कुनै पनि एपको विवरण परिवर्तन हुँदा गुगल अन्तर्गत पूरा गर्नुपर्ने प्रक्रियाहरू सम्पन्न गर्दा अस्थाई रुपमा आउन सक्ने यो एक सामान्य प्रक्रिया मात्र रहेकाे समेत कम्पनीकाे भनाइ छ ।