काठमाडौं । क्रिप्टोकरेन्सी कारोबारमा सँलग्न २ जना माथि राजस्व अनुसन्धान विभागले मुद्दा दायर गरेको छ । विभागले आज मंगलबार काठमाण्डौ जिल्ला अदालतमा मुद्दा दायर गरेको हो ।

विभागले मोरङ जिल्ला रतुवामाई नगरपालिका वडा नं ७ बस्ने २८ को पुस्कर श्रेष्ठ र २३ को बिनिता लिम्बुलाई मुद्दा दायर गरेको हो ।

विभिन्न वैकका वैक स्टेटमेन्टहरु, वरामदित मोवाइलमा प्राप्त डाटाहरुलगायत कल डिटेल विवरण समेतका मिसिल संलग्न प्रमाणबाट पुस्कर श्रेष्ठ र बिनिता लिम्बु समेतका प्रतिवादीहरूले सामूहिक रुपमा मिलिमतो गरी मोबाइल एप्स 1xbet, Binance, Adv Cash, Coinbase, Paxfull प्रयोग गरि विदेशि विनिमय अमेरिकी डलर सम्बन्धि कसुर कार्यमा संलग्न रहि सामूहिक रुपमा मोरङ्ग रतुवामाई नगरपालिकाबाट डलरको अनलाइन मार्फत अवैध रुपमा कारोबार गरेको कसुरजन्य कार्य गरेको विभागले जनाएको छ ।

प्रतिवादीहरु पुस्कर श्रेष्ठ र बिनिता लिम्बुले 1xbet, Binance, Adv Cash, Coinbase, Paxfull मार्फत रकम लोड तथा अनलोड गरी अमेरिकी डलर सटही तथा क्रिप्टोमा लगानीकर्ताको रुपमा रहि कार्य गरी प्रतिवादी पुस्कर श्रेष्ठले मेगा बैंकबाट ८६ लाख ८३ हजार ४२९.८५ रुपैयाँ, सिटिजन्स बैंक २ करोड ५१ लाख ७६ हजार ९९.९७ रुपैयाँ, एनआईसि एशिया बैंकबाट १ करोड ८२ लाख ४९ हजार ८८९ रुपैयाँ, र राष्ट्रिय वाणिज्य बैंकबाट २ करोड ३६ लाख ६२ हजार ५३९ रुपैयाँ गरी कूल ७ करोड ५७ लाख ७१ हजार ८५८ रुपैयाँ तथा बिनिता लिम्बुले एनआईसी एशिया बैंकबाट २ करोड १६ लाख ९८ हजार २४.७४ रुपैयाँ गरी कूल ९ करोड ७४ लाख ६९ हजार रुपैयाँ कारोबार गरेको देखिएको छ ।

विदेशी विनिमय (नियमित गर्ने) ऐन, २०१९ को दफा ३ को उपदफा (१), दफा ४ को उपदफा (१), दफा ५ को उपदफा (१) र दफा १२ बमोजिम नेपाल राष्ट्र बैंकको मिति २०७४/०४/२९, २०७५/१२/२६ र २०७८/०५/२४ को सूचना समेतले निषेधित कसूर गरेको पुष्टि हुन आएकोले निज प्रतिवादीहरु पुस्कर श्रेष्ठ र बिनिता लिम्बुलाई सोही ऐनको दफा १७ को उपदफा (१) बमोजिम बिगो जफत गरी सजाय हुन र दफा १७ को उपदफा (९) बमोजिम तीन वर्षसम्मको कैद सजायको माग गरेको छ ।

कर्पाेरेट बजार

प्रकाशित समय : १७:३६ बजे