काठमाडौं । नेपाल बैंक लिमिटेडको ६५औं वार्षिक साधारण सभा आज नेपाल ए.पि.एफ. क्लब, हलचोक, काठमाडौंमा सम्पन्न भएको छ। बैंकका सञ्चालक समितिका अध्यक्ष थानप्रसाद पंज्ञानीको अध्यक्षतामा बसेको सभाले आर्थिक वर्ष २०८०/८१ को सञ्चालक समितिको वार्षिक प्रतिवेदन, लेखापरीक्षकको प्रतिवेदनसहित २०८१ असार मसान्तको वित्तीय विवरण पारित गरेको छ।

सभाले महालेखापरीक्षकको कार्यालयबाट प्राप्त परामर्शअनुसार आर्थिक वर्ष २०८१/८२ को लागि तीन जना लेखापरीक्षक नियुक्त गर्ने निर्णय सर्वसम्मतिले पारित गरेको छ। लेखापरीक्षकको रूपमा प्रदीप कुमार श्रेष्ठ, मधुवीर पाण्डे र सृष्टि कोइराला नियुक्त भएका छन्।

यसैबीच, बैंकको नियमावलीअनुसार सर्वसाधारण शेयरधनीको तर्फबाट प्रतिनिधित्व गर्ने तीन जना सञ्चालकको निर्वाचन कार्यतालिका रहेको थियो। तर, उच्च अदालत पाटनको २०८१ चैत्र ५ गतेको अल्पकालीन अन्तरिम आदेशका कारण यो प्रक्रिया हाललाई रोकिएको छ। नेपालको पहिलो वाणिज्य बैंकका रूपमा स्थापित नेपाल बैंक लिमिटेडले पछिल्ला वर्षहरूमा वित्तीय क्षेत्रमै सुधार गर्दै आइरहेको छ।

कर्पाेरेट बजार

प्रकाशित समय : १३:२८ बजे