काठमाडौँ । गत असारसम्म बैंक तथा वित्तीय संस्थामा रहेको १४ खर्ब ३० अर्ब ४६ करोड रुपैयाँको बिमा (सुरक्षण) भएको छ ।

५६ वटा बैंक तथा वित्तीय संस्थाका ४ करोड ५७ लाख ९५ हजार खातामा (प्राकृतिक व्यक्तिका) रहेको उल्लिखित रकम बराबर निक्षेप सुरक्षण भएको निक्षेप तथा कर्जा सुरक्षण कोषले जनाएको छ।

बैंकहरूमा रहेको १४ खर्ब ३० अर्ब निक्षेपको बिमा

०८० असार मसान्तमा ४ करोड १३ लाख ८१ हजार खातामा प्राकृतिक व्यक्तिका नाममा रहेको १२ खर्ब ३२ अर्ब ९५ करोड निक्षेप सुरक्षण गरिएको थियो । हालको व्यवस्थाअनुसार बैंक तथा वित्तीय संस्थामा रहेको ५ लाख रुपैयाँ सम्मको बिमा हुनुपर्ने व्यवस्था छ । यो व्यवस्था संस्थाका नाममा खुलेका खातामा रहेको निक्षेपमा पाइँदैन ।

निक्षेप तथा कर्जा सुरक्षण कोषले २०८१ असार मसान्तमा बैंक तथा वित्तीय संस्थाको २ खर्ब ९६ अर्ब ४५ करोड बराबरको लघु तथा विपन्न वर्ग कर्जा, साना तथा मझौला उद्योग कर्जा र कृषि कर्जा (नेपाल सरकारको ब्याज अनुदानमा प्रवाह भएको सहुलियतपूर्ण कर्जासमेत) सुरक्षण गरेको छ । ०८० असार मसान्तमा २७४ अर्ब ५५ करोड रुपैयाँ बराबरको यस्तो कर्जा सुरक्षण गरिएको थियो ।