काठमाडौं । भाइबरले नेपालमा रहेका आफ्ना सबै प्रयोगकर्ताहरुका निम्ति बहुप्रतिक्षित भाइबर लेन्स फिचर आफ्नो मेसेजिंग प्लेटफर्ममा सुरुवात गरेको छ । निःशुल्क र सहज संचारका लागि विश्वकै अग्रणी एपहरु मध्येको एक भाइबरले यो फिचर नेपाल, भिएतनाम र फिलिपिन्समा पहिलोपटक सुरुवात गरिएको हो ।

भाइबर लेन्स फिचर स्न्याप आइएनसीको सहकार्य तथा स्न्यापको क्यामरा किट, क्रियटिभ किट र अनुकूलन–योग्य बिटमोजीलाई भाइबर एपमा एकीकरण गरी तयार गरिएको छ । यो फिचरबाट प्रयोगकर्ताले एआरद्वारा पावर गरिएको फोटो र भिडियो मेसेजमार्फत रमाइलो र अन्तक्रियात्मक संवादहरु गर्न सक्ने कम्पनीले जनाएको छ ।

भाइबरका २० विभिन्न लेन्सहरु समावेश छन् जसमा गायक तथा गीतकार स्वप्न सुमन र कोकाकोलाका लेन्सहरु समावेश गरिएका छन् । कम्पनीले कम्तिमा पनि २० ओटा लेन्सहरु हरेक महिना थप गर्दै लैजाने योजना रहेको घोषणा गरेको छ । व्यापारिक संस्थानहरुले भाइबरमा आफ्ना मौलिक लेन्सहरु समेत सिर्जना गर्ने अवसर प्राप्त गर्ने जनाइएको छ ।

२०७८ भदौ २९ गते प्रकाशित