काठमाडौं । नेपाली अटोमोबाइल बजारको ठूलो प्रदर्शनी ‘एचपी प्रेजेन्ट्स नाडा अटो शो २०२६’ आगामी भदौ ९ देखि १४ गतेसम्म काठमाडौंको भृकुटीमण्डपमा आयोजना हुने भएको छ।

नाडा अटोमोबाइल्स एसोसिएसन अफ नेपाल (नाडा) का अनुसार स्वर्ण जयन्तीको पूर्वसन्ध्यामा आयोजना हुन लागेको अटो शोको यो १८औँ संस्करण हो। प्रदर्शनीमा अटोमोबाइलसँगै आयल तथा पार्टपुर्जा क्षेत्रका व्यवसायीले आफ्ना उत्पादन, सेवा र नयाँ प्रविधि सार्वजनिक गर्नेछन्।

यस वर्षको अटो शोमा साना तथा ठूला गरी २०० वटा स्टल रहनेछन्। प्रदर्शनीमा २२ ब्रान्डका पेसेन्जर कार, १६ ब्रान्डका लाइट कमर्सियल भेहिकल र १२ ब्रान्डका दुईपाङ्ग्रे सवारीसाधन सहभागी हुने नाडाले जनाएको छ।

त्यस्तै, ८ नेपाली उत्पादकसहित कम्पोनेन्ट तथा अन्य सरोकारवाला क्षेत्रका ६९ व्यवसायीले आफ्ना उत्पादन तथा सेवा प्रदर्शन गर्नेछन्।

नाडाका अनुसार अटो शोमा सहभागी हुन व्यवसायीको उत्साह बढेको छ। स्टलका लागि माग उच्च रहे पनि भृकुटीमण्डपमा उपलब्ध स्थान सीमित भएकाले सबै इच्छुक व्यवसायीलाई स्टल उपलब्ध गराउन कठिन भएको आयोजकले जनाएको छ।

विभिन्न स्वदेशी तथा अन्तर्राष्ट्रिय ब्रान्डको सहभागिताले यस वर्षको अटो शोमा नयाँ मोडल, प्रविधि र सेवाबारे जानकारी लिन उपभोक्ताले अवसर पाउनेछन्। विभिन्न ब्रान्डले नयाँ उत्पादन सार्वजनिक गर्ने तयारीसमेत गरेका छन्।