काठमाडौं । विश्व अटोमोबाइल उद्योगमा परम्परागत पाश्चात्य र जापानी ब्रान्डहरूको दबदबालाई तोड्दै चिनियाँ कार निर्माता कम्पनीहरूले तीव्र गतिमा आफ्नो पहुँच र प्रभाव विस्तार गरिरहेका छन्। चाइना प्यासेन्जर कार एसोसिएसन (सीपीसीए) ले सन् २०२६ को पहिलो छ महिनाको बिक्री तथ्याङ्कका आधारमा सार्वजनिक गरेको प्रतिवेदन अनुसार, पहिलो पटक तीन वटा चिनियाँ अटोमोबाइल दिग्गज—बीवाईडी, जिली र चेरी—विश्वका शीर्ष १० ठूला कार निर्माता कम्पनीको सूचीमा पर्न सफल भएका छन्। यसअघि चिनियाँ बजारमा मात्र सीमित देखिने यी ब्रान्डहरूले पछिल्लो एक दशकमा अन्तर्राष्ट्रिय बजारमा देखाएको आक्रामक व्यापारिक रणनीतिका कारण विश्वव्यापी अटोमोबाइल परिदृश्यमा नै ठूलो हेरफेर ल्याइदिएका छन्।

विशेष गरी विद्युतीय सवारी (इभी) उत्पादन र प्रविधिमा अग्रणी मानिएको बीवाईडी कुल ४.८ प्रतिशत विश्व बजार हिस्सा ओगट्दै समग्र बिक्रीको छैटौं स्थानमा उक्लिएको छ। सन् २०१६ मा कम्पनीको विश्व बजार हिस्सा मात्र ०.६ प्रतिशत रहेको अवस्थाबाट एक दशकमै योस्तरको वृद्धि हासिल हुनुलाई अटो क्षेत्रको अभूतपूर्व उपलब्धि मानिएको छ। त्यसैगरी, भोल्भो, पोलस्टार, लोटस, स्मार्ट र प्रोटोनजस्ता बहुचर्चित अन्तर्राष्ट्रिय ब्रान्डहरू आफ्नो स्वामित्वमा सञ्चालन गरिरहेको जिली होल्डिङ ग्रुप ४.६ प्रतिशत बजार हिस्सासहित सातौं स्थानमा पुग्न सफल भएको छ। एक दशकअघि १.५ प्रतिशत हिस्सा बोकेको जिलीले बहु-ब्रान्ड रणनीति अपनाएर युरोप र एसियाली बजारमा बलियो उपस्थिति जनाएको छ।

वैदेशिक निर्यात बजारलाई मुख्य प्राथमिकतामा राखेर तीव्र विस्तार गरिरहेको चेरी ग्रुपले ४.१ प्रतिशत बजार हिस्सा हासिल गर्दै अमेरिकी अटोमोबाइल दिग्गज फोर्डसँग संयुक्त रूपमा नवौं स्थान ओगट्न सफल भएको छ। एक दशकअघि ०.८ प्रतिशत बजार हिस्सामा खुम्चिएको चेरीले पछिल्ला वर्षहरूमा हासिल गरेको यो प्रगतिले चिनियाँ ब्रान्डहरूको विश्वव्यापी स्वीकार्यतालाई स्पष्ट पार्छ। यद्यपि, समग्र विश्व बजारमा ११ प्रतिशत हिस्सासहित जापानी कम्पनी टोयोटा पहिलो स्थानमा कायमै छ भने ८.१ प्रतिशत हिस्सासहित जर्मन अटो समूह फक्सवागन दोस्रो र ७.६ प्रतिशत हिस्सासहित दक्षिण कोरियाली किया–हुन्डाई समूह तेस्रो स्थानमा रहेका छन्।

शीर्ष १० भित्र मात्र नभई शीर्ष २५ कार निर्माताहरूको सूचीमा पनि चिनियाँ कम्पनीहरूको वर्चस्व कायमै छ। एसएआईसी (SAIC) ३.७ प्रतिशत बजार हिस्सासहित ११औं स्थानमा छ भने चांगन, ग्रेट वाल मोटर (जीडब्ल्यूएम), बीएआईसी र डोङफेङजस्ता कम्पनीहरूले पनि विश्व बजारमा आफ्नो पकड मजबूत बनाएका छन्। विश्लेषकहरूका अनुसार चिनियाँ अटो ब्रान्डहरूको यो सफलता उन्नत विद्युतीय प्रविधि, ब्याट्री उत्पादनको आत्मनिर्भरता, डिजिटल फिचर र प्रतिस्पर्धी मूल्य निर्धारण रणनीतिको प्रत्यक्ष प्रतिफल हो, जसले गर्दा परम्परागत इन्धन कार उत्पादकहरूलाई समेत नयाँ युगको अटोमोबाइल प्रतिस्पर्धामा ठूलो चुनौती सिर्जना गरिदिएको छ।