काठमाडौं । महिन्द्राले नयाँ इलेक्ट्रिक एसयूभीको टिजर जारी गरेको छ । महिन्द्राले यसअघि ३ वटा इलेक्ट्रिक एसयूभी लन्च गर्ने घोषणा गरेको थियो । महिन्द्राले १५ अगस्ट २०२२ मा आफ्नो पहिलो इलेक्ट्रिक एसयूभी सार्वजनिक गर्ने भएको छ, यसलाई बोर्न इलेक्ट्रिक भिजन अन्तर्गत ल्याउन लागिरहेको छ ।

महिन्द्राले यसअघि एक्सयूभी४०० इलेक्ट्रिक एसयूभीको टिजर सार्वजनिक गरेको थियो । नयाँ टिजरमा ५ फरक डिजाइनका एसयूभी देख्न सकिन्छ । यो बोर्न इलेक्ट्रिक अन्तर्गत ल्याइने ७ मोडल मध्ये ५ हुनेछ ।

सार्वजनिक गरेको टिजरमा एक्सयूभी९०० कुपे मोडल जस्तो देखिन्छ । साथै एक्सयूभी३०० को इलेक्ट्रिक भर्सन एक्सयूभी ४०० नामले ल्याउने भएको छ । कम्पनीले आगामी दिनमा यी इलेक्ट्रिक एसयूभीको नयाँ टिजर जारी गर्न सक्ने अपेक्षा गरिएको छ ।

महिन्द्राको नयाँ इलेक्ट्रिक एसयूभीमा सी–आकारको एलईडी लाइट र पछाडि एलईडी लाइट स्ट्रिप देख्न सकिन्छ ।

महिन्द्राले कन्सेप्ट कार सन् २०२५ सम्ममा उत्पादनका लागि तयार हुने पुष्टि गरेको छ । यो भन्दा पहिला कम्पनीले एक्सयुभी३०० इलेक्ट्रिक एसयूभी २०२३ को सुरुवातमा लन्च गर्ने योजना बनाएको छ । महिन्द्राले सन् २०२७ सम्ममा ८ वटा इलेक्ट्रिक कार लन्च गर्ने घोषणा गरेको छ ।

महिन्द्राले नयाँ ईभी सब्सिडियरी कम्पनी स्थापना गर्ने योजना बनाएको खुलासा गरेको छ । कम्पनीले बेलायतमा रहेको ब्रिटिश इन्टरनेसनल इन्भेष्टमेन्ट (बीआईआई) सँग सम्झौता गरेको बताएको छ ।