काठमाडौं । माछापुच्छ्रे बैंक लिमिटेडले नेपाल सरकारको ‘करदाता प्रोत्साहन उपहार कार्यक्रम’लाई सहयोग गर्ने उद्देश्यले आफ्नो मोबाइल बैंकिङ एप एमबीएल एम–स्मार्टमा ‘बिल जितौँ’ सुविधा सञ्चालनमा ल्याएको छ।

नेपाल सरकारको आर्थिक वर्ष २०८३/८४ को बजेटअनुसार आन्तरिक राजस्व विभागले बिल लिने संस्कृतिको विकास, डिजिटल भुक्तानीलाई प्रोत्साहन तथा कर प्रणालीलाई थप पारदर्शी बनाउने उद्देश्यले करदाता प्रोत्साहन उपहार कार्यक्रम सञ्चालन गरिरहेको छ।

कार्यक्रमअन्तर्गत नेपालभित्र व्यक्तिगत प्रयोजनका लागि रु. १०० भन्दा बढी मूल्यका वस्तु वा सेवा खरिद गरी बैंक वा वालेटको क्यूआरमार्फत डिजिटल भुक्तानी गर्ने ग्राहकका योग्य कारोबार स्वतः आन्तरिक राजस्व विभागको प्रणालीमा समावेश हुनेछन्। यसका लागि छुट्टै दर्ता गर्नुपर्ने व्यवस्था नरहेको बैंकले जनाएको छ।

माछापुच्छ्रे बैंकका ग्राहकले एमबीएल एम–स्मार्ट एपमा लगइन गरी ‘बिल जितौँ’ मेनुमा प्रवेश गरेपछि उपहार कार्यक्रमका लागि योग्य भएका कुल कारोबार संख्या, कारोबारको विस्तृत विवरण तथा उपहार विजेता भएमा त्यससम्बन्धी जानकारी हेर्न सक्नेछन्।

आन्तरिक राजस्व विभागले योग्य कारोबारमध्येबाट नियमित रूपमा लक्की ड्र सञ्चालन गर्नेछ। जसअन्तर्गत प्रत्येक दिन एक जना विजेतालाई कर कट्टीपश्चात रु. १ लाख तथा प्रत्येक १५ दिनमा एक जना बम्पर विजेतालाई रु. १० लाख पुरस्कार प्रदान गर्ने व्यवस्था गरिएको छ।

बैंकले आफ्ना ग्राहकलाई रु. १०० भन्दा बढीको प्रत्येक खरिदमा क्यूआरमार्फत डिजिटल भुक्तानी गर्न, अनिवार्य रूपमा प्यान बिल लिन र सुरक्षित राख्न तथा एमबीएल एम–स्मार्टको ‘बिल जितौँ’ मेनुमार्फत आफ्नो योग्य कारोबार नियमित रूपमा जाँच गर्न आग्रह गरेको छ।

डिजिटल बैंकिङलाई सहज, सुरक्षित र ग्राहकमैत्री बनाउँदै सरकारी डिजिटल भुक्तानी तथा कर सचेतना अभियानमा सहकार्य गर्न बैंक निरन्तर प्रतिबद्ध रहेको जनाएको छ।

बैंकले ‘डिजिटल भुक्तानी गरौँ, बिल लिऔँ, सुरक्षित राखौँ र रु. १० लाखसम्मको उपहार जित्ने अवसर नछुटाऔँ’ भन्ने सन्देशसहित ग्राहकलाई कार्यक्रममा सक्रिय सहभागिता जनाउन आह्वान गरेको छ।