हेटौँडा । लामो समयदेखि बन्द अवस्थामा रहेको ऐतिहासिक हेटौँडा कपडा उद्योग पुनः सञ्चालनको तयारीस्वरूप उद्योग परिसरमा प्रारम्भिक पूर्वाधार व्यवस्थापनका कामहरू सुरु भएका छन् । उद्योगलाई ब्युँताउने सरकारी नीति अनुरूप अहिले उद्योग परिसरमा सरसफाइ तथा विद्युत् जडानको काम तीव्र पारिएको हो ।

औद्योगिक क्षेत्र व्यवस्थापन लिमिटेड, हेटौँडा शाखाका सूचना अधिकारी हिमालय भण्डारीका अनुसार हाल उद्योगभित्र प्रारम्भिक तयारीका कामलाई प्राथमिकता दिइएको छ । वर्षौंदेखि उद्योग परिसरमा थुप्रिएको झारपात, फोहोर तथा अनावश्यक सामग्री हटाउने कार्यसँगै उद्योग सञ्चालनका लागि आवश्यक विद्युत् प्रसारण तथा जडानको काम पनि सँगसँगै अघि बढाइएको भण्डारीले जानकारी दिए ।

नेपाली सेनाको टोलीले मेसिन र भवनको प्राविधिक मूल्याङ्कन गर्ने

पहिलो चरणको सरसफाइ र विद्युत् आपूर्तिको काम पूरा भएपछि उद्योगभित्र रहेका भौतिक संरचना र मेशिनरीहरूको विस्तृत प्राविधिक मूल्याङ्कन गरिनेछ । लामो समयदेखि उद्योग बन्द रहेकाले भवन, मेसिन तथा उपकरणहरूको वास्तविक अवस्था कस्तो छ भन्नेबारे अध्ययन गर्न आवश्यक रहेको सूचना अधिकारी भण्डारीले बताए ।

उक्त प्राविधिक अध्ययन र निरीक्षणका लागि नेपाली सेनाको प्राविधिक टोलीले आवश्यक तयारी गरिरहेको उनले जानकारी दिए । सेनाको टोलीले गर्ने प्राविधिक परीक्षण र मूल्याङ्कनपछि मेसिनहरूको मर्मत सम्भारको प्रक्रिया अघि बढाइनेछ ।

स्वदेशी उत्पादनको धरोहर: २०५६ देखि पूर्ण ठप्प

चीन सरकारको आर्थिक तथा प्राविधिक सहयोगमा स्थापना भएको हेटौँडा कपडा उद्योग मुलुककै पुराना र ऐतिहासिक सरकारी उद्योगहरूमध्ये एक हो । वि.सं. २०३५ सालदेखि व्यावसायिक उत्पादन सुरु गरेको यस उद्योगले एक समय स्वदेशी कपडा उत्पादन र आपूर्तिमा मुलुकलाई आत्मनिर्भर बनाउन महत्वपूर्ण योगदान पुर्‍याएको थियो ।

आफ्नो पूर्ण क्षमतामा सञ्चालन हुँदा यस उद्योगले १ हजार २०० भन्दा बढी नागरिकलाई प्रत्यक्ष रोजगारी दिएको थियो । तर, विविध व्यवस्थापकीय तथा प्राविधिक कारणले गर्दा वि.सं. २०५६ सालदेखि यो उद्योग पूर्ण रूपमा बन्द हुन पुगेको थियो ।

सरकारले देशका बन्द तथा रुग्ण अवस्थामा रहेका सरकारी उद्योगहरूलाई पुनः सञ्चालन गर्ने नीति अघि सारेसँगै हेटौँडा कपडा उद्योगमा पनि चहलपहल सुरु भएको हो । चरणबद्ध रूपमा अघि बढाइएको यस कार्यले पूर्णता पाएमा मुलुकको औद्योगिक क्षेत्र र रोजगारी सिर्जनामा ठूलो राहत पुग्ने विश्वास लिइएको छ ।