काठमाडौं । सामाजिक सुरक्षा कोषमा आबद्ध श्रमिकहरूका लागि खुसीको खबर छ। कोषले पहिलो पटक श्रमिकहरूलाई घडेरी किन्नका लागि विशेष कर्जा योजना सार्वजनिक गरेको छ। अब कोषमा आबद्ध श्रमिकले घडेरी खरिद गर्न १ करोड ५० लाख रूपैयाँसम्म ऋण पाउने भएका छन्।

अन्तर्राष्ट्रिय श्रमिक दिवसको अवसरमा श्रम, रोजगार तथा सामाजिक सुरक्षामन्त्री राजमी यादवले यस नयाँ योजनाबारे औपचारिक जानकारी दिनुभएको हो। मन्त्री यादवका अनुसार योगदानमा आधारित सामाजिक सुरक्षा कोषमा आबद्ध श्रमिकले ६ प्रतिशत ब्याजदरमा उक्त रकम बराबरको सापटी लिन सक्ने व्यवस्था मिलाइएको छ।

कर्जा पाउन १८ महिना योगदान अनिवार्य

कोषका प्रवक्ता कृष्ण अधिकारीले यस कर्जाका लागि केही सर्तहरू तय गरिएको जानकारी दिनुभयो। प्रवक्ता अधिकारीका अनुसार:

• श्रमिकले कोषमा नियमित रूपमा कम्तीमा १८ महिनासम्म आबद्ध भई मासिक योगदान गरेको हुनुपर्नेछ।

• श्रमिकले कोषमा जम्मा गरेको रकमको आधारमा नियमानुसार अधिकतम १ करोड ५० लाख रूपैयाँसम्म ऋण प्रदान गरिनेछ।

• यस कर्जाको ब्याजदर वार्षिक ६ प्रतिशत मात्र हुनेछ।

कोषले यसअघि नै घर कर्जा, घर निर्माण कर्जा र शैक्षिक कर्जा जस्ता सुविधाहरू उपलब्ध गराउँदै आएकोमा अब घडेरी कर्जा पनि थपिएको हो। यो व्यवस्थाले आफ्नै घडेरी जोड्न चाहने श्रमिकहरूलाई ठूलो राहत पुग्ने विश्वास गरिएको छ।