काठमाडौं । काठमाडौंको बुढानीलकण्ठ नगरपालिकाको मंगलबार सम्पन्न १२ औं स्थापना दिवसमा लेखा तर्फबाट उत्कृष्ट कर्मचारी घोषित लेखाप्रमुख केदारप्रसाद देवकोटालाई नगरपालिकाले सम्मान गरेको छ ।

नगरपालिकाको प्रांगणमा आयोजित कार्यक्रममा लेखाप्रमुख देवकोटालाई कार्यक्रमका प्रमुख अतिथि वागमति प्रदेशका श्रम, रोजगार तथा यातायातमन्त्रीका साथै नगर प्रमुख मिठाराम अधिकारीलगायतले सम्मान गरे ।

२०४५ सालदेखि सरकारी सेवामा प्रवेश गरेका देवकोटा एमालेनिकट नेपाल निजामती कर्मचारी संगठनको पूर्वअध्यक्ष भइसकेका छन् । उनी पेशागत महासंघ नेपालका महासचिव हुन् । उनले केही स्थानीय तहमा रहेर प्रमुख प्रशासकीय अधिकृतको भूमिका पनि निर्वाह गरिसकेका छन् । उनले नागरिकको सेवा नै आफ्नो पहिलो दायित्व भएकाले त्यहीअनुसार काम गर्दै आएको बताएका छन् । वार्षिकोत्सवको अवसरमा नगरपालिकाले अन्य विधाका उत्कृष्टलाई पनि सम्मान गरेको थियो ।

कर्पाेरेट बजार

प्रकाशित समय : १८:११ बजे