काठमाडौं ।   नेपालको पहिलो डिजिटल भुक्तानी सेवा प्रदायक कम्पनी इसेवा लिमिटेडले आफ्नो १२औं वार्षिक साधारण सभा सम्पन्न गरेको छ।

कम्पनीको सभामा आर्थिक वर्ष २०८०/८१ का वार्षिक प्रतिवेदन, लेखापरीक्षकको प्रतिवेदनसहित वासलात, नाफानोक्सान विवरण र नगद प्रवाह विवरणमाथि छलफल गर्दै पारित गरिएको छ । यसका साथै, नगद लाभांश वितरणका विषयमा पनि निर्णय गरियो।

मोबाइल टपअप सेवा मार्फत सुरु भएको इसेवाले हाल दुई हजार भन्दा बढी सेवाहरू, जस्तै बिजुली र खानेपानी महसुल, हवाइजहाज र बस टिकट, स्कुल कलेज शुल्क, ब्लूबुक नविकरण, र इन्स्योरेन्स शुल्क भुक्तानीजस्ता सेवा प्रदान गरिरहेको छ। इसेवाका प्रयोगकर्ताहरू १ करोड ३० लाख नाघिसकेका छन् भने करिब २ लाख ८० हजार एजेन्टहरूले सेवा उपलब्ध गराइरहेका छन्।

कार्यक्रममा इसेवाका अध्यक्ष पर्शुराम कुँवर क्षेत्री र कार्यकारी प्रमुख जगदीश खड्काले डिजिटल भुक्तानीको क्षेत्रमा नयाँ आयाम थप्ने योजना प्रस्तुत गरे।

खड्काले इसेवाले निर्देशनअनुसार सीमित विद्युतीय कारोबारको सुविधा सुरु गरेको र निकट भविष्यमा बचत तथा लगानी जस्ता सेवाहरू थप्ने लक्ष्य रहेको जानकारी दिए।