काठमाडौं । निर्जीवन बीमा कम्पनीहरूको व्यवसाय विवरण सावर्जनिक भएको छ । निर्जीवन बीमा व्यवसाय गर्ने बीमा कम्पनीहरूले पहिलो त्रैमासमा ११ अर्ब ३८ करोड ७९ लाख रुपैयाँ कुल बीमा शुल्क आर्जन गरेका छन् ।

चालु आर्थिक वर्षको पहिलो त्रैमास (साउनदेखि असोज) महिनासम्म निर्जीवन बीमा व्यवसाय गर्ने बिमकहरूले ६ लाख ६८ हजार १४० पोलिसी जारी गरेर यस्तो व्यापार गरेका हुन् । बिमकहरूले असोज महिनामा मात्रै २ लाख ४० हजार पोलिसी जारी गरेर ३ अर्ब ६४ करोड १२ लाख रुपैयाँ प्रिमियम संकलन गरेको नेपाल बिमा प्राधिकरणले सावर्जनिक गरेको तथ्यांकमा देखाइएको छ ।

गत आर्थिक वर्षको यसै अवधिमा निर्जीवन बीमा व्यवसाय गर्ने बिमकहरूले ६ लाख ८१ हजार ४६४ पोलिसी जारी गरेर १० अर्ब ४४ करोड ५५ लाख रुपैयाँ कुल बीमा शुल्क आर्जन गरेका थिए ।

हाल संचालित १४ निर्जीवन बीमा कम्पनीहरू मध्ये पहिलो त्रैमासमा सबैभन्दा बढि बीमा व्यापार गरी प्रिमियम संकलन गर्ने पहिलो रहेको छ सगरमाथा लूम्विनी इन्स्योरेन्स । कम्पनीले साउनदेखि असोज महिनासम्म ६९ हजार ७४७ पोलिसी जारी गरेर १ अर्ब ४३ करोड ६३ लाख रुपैयाँ कुल बीमा शुल्क आर्जन गरेको हो ।

त्यसैगरी, बढि बीमा शुल्क आर्जन गर्ने दोस्रो नम्बरमा सिद्धार्थ प्रिमियर इन्स्योरेन्स रहेको छ । कम्पनीले ७४ हजार ७८९ पोलिसी जारी गरेर १ अर्ब १७ करोड १९ लाख रुपैयाँ प्रिमियम संकलन गरेको छ । तेस्रो नम्बरमा शिखर इन्स्योरेन्सले ७३ हजार ९३४ पोलिसी जारी गरेर १ अर्ब १२ करोड रुपैयाँ कुल बीमा शुल्क आर्जन गरेको देखिन्छ ।

त्यसैगरी, चालु आवको पहिलो त्रैमास (साउनदेखि असोज) महिनासम्म आइजिआई प्रूडेन्सियल इन्स्योरेन्सले ५० हजार २३८ पोलिसी जारी गरेर ९० करोड ९ लाख, नेको इन्स्योरेन्सले ८९ करोड ७५ लाख, हिमालयन एभरेष्टले ९१ करोड ८७ लाख, दि.ओरिएन्टल इन्स्योरेन्सले ८३ करोड ७६ लाख, युनाइटेड अजोडले ६८ करोड, एनएलजी इन्स्योरेन्सले ७५ करोड २२ लाख रुपैयाँ प्रिमियम संकलन गरेका हुन् ।

यता नेपाल इन्स्योरेन्सले ६१ करोड ४५ लाख, सानिमा जिआईसीले ५८ करोड ८९ लाख, राष्ट्रिय बीमा कम्पनीले ५७ करोड ३९ लाख र नेशनल इन्स्योरेन्सले अन्य कम्पनीको भन्दा कम ४१ करोड ७६ लाख रुपैयाँ कुल बीमा शुल्क आर्जन गरेको सावर्जनिक तथ्यांकमा देखिएको छ ।