काठमाडौँ । नेपालका लागि आधिकारिक वितरक स्यामुकापु ट्रेडिङले चिनियाँ टु–ह्विलर ब्रान्ड जोनसेन नेपालमा ल्याएकाे छ । स्यामुकापु ट्रेडिङले मोटरसाइकल तथा स्कुटरका ९ वटा मोडल सार्वजनिक गरेकाे छ ।

सार्वजनिक गरिएका मोडलमा शक्तिशाली अफरोड मोटरसाइकलदेखि प्रिमियम मोडलका बाइक समेत समावेश छन् । यी मोटरसाइकल तथा स्कुटरहरू मंगलबारदेखि हुन लागेकाे नाडा अटो शोमा राखिने भएकाे छ ।

कति रहेकाे छ मूल्य ?

कम्पनीले २१६ .६ सिसी ईन्जिन क्षमताको मोटरसाइकल ल्याएको छ । यस माेटरसाइकलकाे ५ लाख ६० हजार रूपैयाँ बजार मूल्य रहेकाे छ ।

यसैगरी, १४९.४ सिसीको माेटरसाइकलकाे ३ लाख ३० हजार रूपैयाँ ताेकिएकाे छ । अर्काे, १९६.४ सिसीको ३ लाख ७५ हजार रूपैयाँ र ११९.६ सिसीको २ लाख ७५ हजार रुपैयाँ पर्ने भएकाे छ ।

१६६.४ सिसी मोटरसाइकलको ३ लाख ८४ हजार रूपैयाँ पर्दा १९८.८ सिसीको ४ लाख ५५ हजार रूपैयाँ कम्पनीले निर्धारण गरेकाे छ । त्यस्तै, २३० सिसीको ४ लाख ७० हजार रूपैयाँ पर्ने भएकाे छ भने २१७ सिसीको ४ लाख ९० हजार रूपैयाँ ताेकिएकाे छ । कम्पनीका अनुसार २५० सिसीको माेटरसाइकलकाे ६ लाख ५० हजार रुपैँया पर्नेछ ।

ग्राहकले पाउनेछन् यी सुविधा

यी मोटरसाइकलको खरिदमा ग्राहकले ६ वटा फ्रि सर्भिसिङ र हेल्मेट समेत पाउने भएका छन् । यस माेटरसाइकलकाे फाइनान्स र एक्सचेन्जको सुविधा समेत पाइनेछ । यी बाइकमा दुई वर्ष वा ३० हजार किलोमिटरकाे वारेन्टी प्रदान गरिने भएकाे छ।

 

ज्योती ग्रुपले यो मोटरसाइकललाई नेपाल ल्याएको हो । यसअघि, ज्योती ग्रुपले हिरो मोटरसाइकल बिक्री गर्दै आएको थियाे । यी बाइकहरू विराटनगर, विरगंज, भरतपुर, काठमाडौं, पोखरा, भैरहवा र वुटवलस्थित शोरुमबाट बिक्री गरिने भएकाे छ ।

जोनसेनले चीनमा सन् १९९६ देखी मोटरसाइकल उत्पादन गर्दै आएको छ । चीनको उत्कृष्ट ५०० इन्टरप्राइजेज तथा ३० अटोमोबाइल कम्पनीमा याे कम्पनी पर्दछ । विश्वका ८० भन्दा बढी देशहरूमा यस कम्पनीले वार्षिक तीन लाख बढी मोटरसाइकल निर्यात गरिरहेकाे जनाएकाे छ । इलेक्ट्रिक टु–ह्विलर समेत बिक्री गर्ने जोनसेनले ७० लाखभन्दा बढी कम्पोनेन्ट उत्पादन गर्ने गरेकाे छ ।