काठमाडौँ । नियामक धितोपत्र बोर्डबाट जारी नयाँ स्टक एक्सचेञ्ज, ब्रोकर लाइसेन्स र कमोडिटी एक्सचेन्जको लाइसेन्स वितरणको मुद्दामा अर्थ समितिमा प्रश्न उठेको छ ।

विवादकाबीच लाइसेन्स वितरण कार्य तत्काल रोक्न अर्थ समितिले परिपत्र गरिसकेको अवस्थामा समेत धितोपत्र बोर्डले अटेर गरेको भन्दै सोमबार बसेको बैठकमा सदस्य पदम गिरीले प्रश्न उठाएका हुन् ।

हाल स्थगित गरिएको नयाँ स्टक एक्सचेन्जको मुद्दामा बोल्दै सांसद गिरीले भने, ‘धितोपत्र बोर्डबाट नियमावली नै संशोधन भएर अघि बढेको नयाँ स्टक एक्सचेन्जको प्रक्रिया हाललाई रोकिएको छ ।

यो स्थगित मात्र भएको हो, फेरि यो भविष्यमा जतिबेलामा पनि अघि बढ्न सक्छ, लाइसेन्स पाउन सक्छन् । यो अहिलेको आवश्यकता हो कि होइन ?’

यसअघिको अर्थ समितिले बनाएको अर्को उपसमितिले नै हालको एक मात्र स्टक एक्सचेन्जलाई व्यापक सुधार एवम् परिमार्जन गर्दै प्राविधिक, भौतिक एवम् व्यवस्थापकीय सुधार गरी अन्तर्राष्ट्रिय स्तरको बनाउने भनिएको थियो ।

भारत, श्रीलङ्का, बङ्गलादेश लगायतका मुलुकहरूमा अध्ययन गरेर कार्यान्वयन गरिने भनिएको थियो।

तर, उक्त प्रतिवेदनलाई समेत बेवास्ता गर्दै नियामक धितोपत्र बोर्डले थप ब्रोकर लाइसेन्ससँगै नयाँ स्टक एक्सचेन्जको लाइसेन्स प्रक्रिया समेत अघि बढाएको उनको गिरीले आरोप लगाए ।

हाल थप ब्रोकर लाइसेन्स र कमोडिटी एक्सचेञ्जका लागि बोर्डले लाइसेन्स वितरण गरिरहेपनि यता नयाँ स्टक एक्सचेन्जको लाइसेन्स वितरणको प्रक्रिया भने प्रधानमन्त्रीको ठाडो निर्देशनमा रोकिएको छ ।