काठमाण्डौ । मुक्तिनाथ फाउन्डेसनको आज एक कार्यक्रमबीच औपचारिक रुपमा शुभारम्भ गरिएको छ।

मुक्तिनाथ विकास बैंक, मुक्तिनाथ कृषि कम्पनी र यस समूहसँग सम्बन्धित व्यक्तिहरुको अगुवाइमा मुक्तिनाथ फाउन्डेसन गत असोज १ गते कम्पनी रजिस्ट्रारको कार्यालयमा दर्ता भएको थियो। सोही संस्थाको आज राजधानीमा आयोजित एक कार्यक्रमबीच औपचारिक रुपमा शुभारम्भ गरिएको हो।

सामाजिक तथा आर्थिक रुपले पछाडि परेका व्यक्ति तथा समुदायलाई सहयोग तथा सहजीकरण गरी उनीहरुको जीवनस्तर उकास्ने मूल उद्देश्य यो संस्थाको रहेको छ। यस संस्थाले समाजका सबै वर्ग र समुदायका मानिसहरुलाई आफ्ना कार्यक्रमहरुका माध्यमबाट लक्षित गर्नेछ। यसका साथै उनीहरुको आवश्यकतानुसार सहजीकरण र सेवाका कार्यक्रम सञ्चालन गर्नेछ।

बेरोजगारीको चपेटामा परेका युवावर्गका लागि रोजगारी सिर्जना गर्ने र रोजगारीका अवसरमा सहज पहुँच पुर्याउने संस्थाको मुख्य अवधारणा रहेको छ। यसका अतिरिक्त लक्षिण वर्गलाई उपयोगी हुने सामाजिक तथा आर्थिक विकासका कार्यक्रमलाई प्राथमिकता दिने संस्थाको मूल ध्येय रहेको छ।

संस्थाले राजनीतिक, सामाजिक, आर्थिक, सांस्कृतिक, कृषि, सूचना तथा सञ्चार, कृषि, स्वास्थ्य, नागरिक समाज, कानुनी, अन्तर्राष्ट्रिय सम्बन्ध, वातावरण, व्यवस्थापकीय, प्राविधिक र दिगो विकास लक्ष्यजस्ता आयामहरुको परिधिमा रहेर काम गर्नेछ।

मुलुकको सर्वाङ्गिण विकासका लागि राज्यले तीनखम्बे आर्थिक नीति अवलम्बन गरेको छ। यिनै खम्बाहरुलाई संस्थाले प्रवर्द्धन गर्नेछ।

संस्थाले लक्षित वर्ग केन्द्रित जीवनस्तर उकास्ने कार्यक्रमहरु सञ्चालन गर्नेछ। व्यावसायिक शिक्षा तथा गुणस्तरीय स्वास्थ्य सेवाजस्ता आधारभूत सेवाहरुमा सबैको पहुँच पुर्याउन सहजीकरण गर्नेछ। स्वास्थ्य खानपानका लागि चेतनामूलक कार्यहरु गर्नेछ। समाजको आर्थिक तथा सामाजिक विकासका लागि आवश्यक प्रशिक्षण कार्यक्रमहरु संस्थाले गर्नेछ।

विभिन्न किसिमका दिवा सेवा केन्द्र, स्याहार केन्द्र, ज्येष्ठ नागरिक आश्रम, मिलन केन्द्रहरु सञ्चालन गर्न पनि संस्थाले पहल गर्नेछ।

सदस्यता शुल्क र सदस्यहरुबाट गरिने योगदान संस्थाको मुख्य आर्थिक स्रोत हुनेछ। आफ्ना सदस्यहरुलाई वार्षिक रुपमा निरन्तर योगदान गर्न संस्थाले प्रेरित गर्नेछ। यसका अलावा संस्थाले बैंक तथा वित्तीय संस्थाहरुबाट संस्थागत सामाजिक उत्तरदायित्वका प्रावधानहरुमा समन्वय गरी आर्थिक स्रोत संकलन गर्ने प्रयास गर्नेछ।

संस्थाले लक्षित समुदायमा सदस्यता विस्तार गर्नेछ। सदस्यतालाई व्यापकता दिने लक्ष्य संस्थाले राखेको छ। केन्द्रलगायत प्रदेश र स्थानीय तहमा सदस्यता तथा सञ्जाल विस्तार गर्नेछ।

प्रारम्भमा बागमती र गण्डकी प्रदेशबाट कार्य प्रारम्भ गरी संस्थाले अबको ५ वर्षमा सातै प्रदेशमा १० वर्षमा ७७ जिल्लामा सञ्जाल विस्तार गर्ने लक्ष्य राखेको छ।

संस्थाको प्रथम सञ्चालक समितिमा भरतराज ढकाल, सीताराम काफ्ले, तुलसीराम ढकाल, नारायणकुमार श्रेष्ठ, रामप्रसाद पोखरेल, विमलकुमार निरौला र निशा बस्नेत छन्।

संस्थाको प्रदेशमा प्रदेशस्तरको कार्यकारी समिति र कार्यालय रहनेछ। जिल्लामा पनि जिल्लास्तरीय समिति र कार्यालय रहने संस्थाले जनाएको छ। वडा र गाउँ–नगरमा पनि आवश्यकतानुसार सञ्जाल विस्तार गरिने संस्थाको योजना छ।