काठमाडौं – सेयर बजारले आज नयाँ रेकर्ड राखेको छ । आज सेयर कारोबार मापक नेप्से परिसूचक १७ दशमलव २० अंकले बढेर २६९१.५५ को बिन्दुमा पुगी रोकिएको छ । सेयर बजार २७ सय बिन्दु नजिक पुगेको हो । सेयर बजार ०.६४ प्रतिशतले बढेको हो । अघिल्लो मंगलबार नेप्से परिसूचक १५ दशमलव ७२ अंकले बढेर २६ सय ७४ दशमलव ४६ को बिन्दुमा पुगी नयाँ रेकर्ड राखेको थियो ।

साताको अन्तिम दिन बिहिबार सेयर कारोबार मापक नेप्से परिसूचक २ दशमलव ७४ अंकले बढेर २६ सय ७४ दशमलव ३५ को बिन्दुमा पुगेर रोकिएको थियो । साताको पहिलो दिन आइतबार सार्वजनिक बिदा थियो । जसको कारण सेयर बजार बन्द थियो ।  तीन दिनपछि खुलेको बजारले आज नयाँ रेकर्ड कायम गरेको हो। 

त्यस्तै, सेन्सेटिभ परिसूचक ३ दशमलव ७८ अंकले बढेर ४८० दशमलव २९ पुगेको छ । कूल २ सय १६ कम्पनीको सेयर कारोबार भएको छ । कूल २ सय १६ कम्पनीको एक करोड ३६ लाख ३२ हजार ८ सय कित्ता सेयर खरिदबिक्री हुँदा ७ अर्ब ५० करोड ४७ लाख २१ हजार ७ सय २९ रुपैयाँ बराबरको कारोबार भएको छ । बिहिबार २ सय ७ वटा कम्पनीको एक करोड ३२ लाख ४३ हजार ३ सय ६५ कित्ता सेयर खरिदबिक्री हुँदा ६ अर्ब ४७ करोड ३४ लाख १६ हजार २ सय ७४ रुपैयाँ बराबरको कारोबार भएको थियो ।

१३ उपसमूह मध्ये ७ वटा उपसमूहको सेयर बढेको छ भने ६ वटा उपसमूहको सेयरमूल्य घटेको छ । बैंकिङ्ग समूहको सेयर ०.९८ प्रतिशतले बढेको छ । त्यसैगरी, विकास बैंक, निर्जीवन बीमा, उत्पादन, लघुवित्त, जीवन बीमा र म्युचुअल फण्ड समूहको सेयरमूल्य बढेको छ ।होटल र पर्यटन, फाइनान्स,  व्यापार, हाइड्रोपावर,  लगानी र अन्य समूहको सेयरमूल्य घटेको छ ।