सिडिएससीको एपिआईले सहज बनायो शेयर फुकुवा: अब रिलिज भएकै दिन बिक्री गर्न मिल्ने
शेयर फुकुवा भएको जानकारी सिस्टममा अपडेट हुन दुई देखि तीन दिनसम्म लाग्ने गरेको थियो। जसका कारण बजार बढेको बेला नाफा सुरक्षित गर्न चाहने लगानीकर्ताहरू प्राविधिक ढिलासुस्तीले गर्दा शेयर बेच्न नपाएर करोडौँको नोक्सानी बेहोर्न बाध्य थिए।
वि.सं.२०८३ वैशाख १७ बिहीवार
काठमाडौं । नेपालको पूँजी बजारमा शेयर धितो कर्जा (मार्जिन लेन्डिङ) लिएका लगानीकर्ताहरूले भोग्दै आएको ठूलो प्राविधिक झन्झट समाधान भएको छ।
सिडिएस एण्ड क्लियरिङ्ग लिमिटेड (सिडिएससी) ले बैंक, सिडिएससी र ब्रोकरको ट्रेडिङ म्यानेजमेन्ट सिस्टम (टिएमएस) लाई ‘एपिआई’ (API) मार्फत जोडेपछि शेयर फुकुवा (Pledge Release) भएकै क्षण दोस्रो बजारमा बिक्री गर्न सम्भव भएको हो।
यसअघि शेयर फुकुवा भएको जानकारी सिस्टममा अपडेट हुन दुई देखि तीन दिनसम्म लाग्ने गरेको थियो। जसका कारण बजार बढेको बेला नाफा सुरक्षित गर्न चाहने लगानीकर्ताहरू प्राविधिक ढिलासुस्तीले गर्दा शेयर बेच्न नपाएर करोडौँको नोक्सानी बेहोर्न बाध्य थिए।
के हो नयाँ एपिआई सुविधा ?
सिडिएससीले विकास गरेको नयाँ एपिआई प्रणालीले डाटा आदानप्रदानलाई ‘रियल टाइम’ (तत्काल) मा सम्भव बनाउँछ। अब लगानीकर्ताले बैंकमा कर्जा चुक्ता गर्ने बित्तिकै बैंक कर्मचारीले सिस्टमबाट ‘प्लेज रिलिज’ को बटन थिच्नासाथ सोही सेकेन्डमा ब्रोकरको टिएमएसमा उक्त शेयर बिक्रीका लागि उपलब्ध हुन्छ। यसले लगानीकर्तालाई बजारको उतारचढाव अनुसार तत्काल निर्णय लिन सक्ने सुविधा प्रदान गरेको छ।
५० प्रतिशत ब्रोकरमा अझै पुरानै समस्या
प्रविधि तयार भए पनि सबै लगानीकर्ताले यो सुविधा अझै पाउन सकेका छैनन्। सिडिएससीका अनुसार हालसम्म करिब ५० प्रतिशत ब्रोकर कम्पनीहरूले मात्र यो एपिआई प्रणाली आफ्नो टिएमएसमा जडान गरेका छन्।
सिडिएससीका प्रवक्ता सुरेश न्यौपानेले सबै ब्रोकरलाई एपिआई लिन आह्वान गरिसकिएको जानकारी दिए। “एपिआई जडान गरेका ब्रोकरका ग्राहकले फुकुवा भएकै क्षण शेयर बेच्न पाइरहेका छन्,” उनले भने, “तर सिस्टम अपडेट नगरेका बाँकी ५० प्रतिशत ब्रोकरका लगानीकर्ताले अझै पनि शेयर बेच्न अर्को दिन कुर्नुपर्ने पुरानै सास्ती भोगिरहेका छन्।”
ब्रोकरको ढिलासुस्तीले लगानीकर्तालाई सास्ती
सिडिएससीले सहजै एपिआई उपलब्ध गराउँदा पनि आधा ब्रोकरहरूले प्रविधि स्तरोन्नतिमा चासो नदेखाएको पाइएको छ। टिएमएस भेन्डरसँगको समन्वय अभाव र प्राविधिक परीक्षणमा ढिलाइ गर्दा एउटै बजारमा लगानीकर्ताहरूबीच विभेद सिर्जना भएको छ।
एउटै बजारमा कोही लगानीकर्ताले तत्काल शेयर बेच्न पाउने र कोहीले दुई दिन कुर्नुपर्ने अवस्थाले बजारको निष्पक्षतामाथि नै प्रश्न उठाएको छ। यस समस्यालाई समाधान गर्न नेपाल स्टक एक्सचेन्ज (नेप्से) र नेपाल धितोपत्र बोर्ड (सेबोन) ले सबै ब्रोकरलाई तत्काल प्रणाली अद्यावधिक गर्न कडा निर्देशन दिनुपर्ने माग लगानीकर्ताहरूले गरेका छन्।
प्रकाशित समय : १३:३२ बजे
