काठमाडौं । बुधबार नेप्से परिसूचक बढेर बन्द भएको छ। पछिल्ला २ कारोबार दिनदेखि बढिरहेको नेप्सेले पनि सोही क्रमलाई निरन्तरता दिएको हो।

नेप्से परिसूचक १०.३० अंक बढेर २६४८.९० विन्दुमा पुगेको छ। त्यस्तै सेन्सेटिभ इण्डेक्स १.२० अंक बढेको छ भने फ्लोट इण्डेक्स ०.८५ अंक र सेन्सेटिभ फ्लोट इण्डेक्स ०.४४ अंक बढेको छ।नेप्सेसँगै  कारोबार रकम पनि सामान्य बढेको छ।

अघिल्लो कारोबार दिन अर्थात मंगलबार ४ अर्ब २३ करोड रुपैयाँबराबरको शेयर खरिदबिक्री भएको बजारमा  ३३३ स्टकको ४८ हजार ६४० पटकको कारोबारमा ४ अर्ब ४५ करोड ११ लाख ४९ हजार रुपैयाँबराबरको १ करोड ४ लाख ५६ हजार कित्ता शेयर खरिदबिक्री भएको छ। दुई स्टकको शेयर सकारात्मक सर्किट लेभलमा कारोबार भएको छ। यस दिन सालपा विकास बैंक र रिलायन्स स्पिनिङ्ग मिल्सको शेयर सकारात्मक सर्किट लेभलमा कारोबार भएको हो।

त्यस्तै विन नेपाल लघुवित्त वित्तीय संस्थाको शेयरमूल्य साढे ९ प्रतिशतभन्दा बढी बढेको छ भने सुपरमाई हाइड्रोपावरको शेयरमूल्य ९ प्रतिशतभन्दा बढी बढेको छ। कारोबारमा आएको हिमालयन पावर पार्टनरको शेयरमूल्य सर्वाधिक ५.९८ प्रतिशत घटेको छ।

कारोबार रकमका आधारमा आँखु खोला जलविद्युत कम्पनी शीर्ष स्थानमा रहेको छ। सो कम्पनीको  २८ करोड ६९ लाख १९ हजार रुपैयाँबराबरको शेयर किनबेच भएको छ। त्यस्तै ङादी ग्रुप पावरको करिब साढे २५ करोड रुपैयाँको शेयर कारोबार भएको छ भने एसवाई प्यानल नेपालको कारोबार रकम २३ करोड रुपैयाँ नाघेको छ।

१३ उपसमूहमध्ये १० उपसमूहको परिसूचक बढेको छ भने ३ उपसमूहको परिसूचक घटेको छ।  जीवन बीमा उपसमूहको परिसूचक सर्वाधिक १.७९ प्रतिशत बढेको छ।  वित्त, म्युचुअल फण्ड र व्यापार उपसमूहको परिसूचक सामान्य घटेको हो।