गण्डकी प्रदेश सरकारले पालिकाको विपद् कोषमा पाँच लाख सहयोग दिने
वि.सं.२०७८ असार २५ शुक्रवार
काठमाडौँ । गण्डकी प्रदेश सरकारले सबै पालिकालाई विपद् व्यवस्थापनका लागि सहयोग गर्ने भएको छ । प्रदेश सरकारले ८५ वटै पालिकालाई पाँच लाखका दरले रकम पठाउने भएको हो । सरकारका प्रवक्ता मन्त्री कुमार खड्काका अनुसार बिहीबार बसेको मन्त्रिपरिषद् बैठकले उक्त निर्णय गरेको हो ।
स्थानीय विपद् व्यवस्थापन कोषमा विपद्जन्य घटनाहरूको रोकथाम, उद्धार र राहत तथा पुनःस्थापनालगायत प्रयोजनका लागि मात्र खर्च गर्न उक्त रकम दिन लागिएको हो । चालु आर्थिक वर्षको बजेटबाटै उक्त रकमको व्यवस्थापन गरिने छ ।
उनका अनुसार अहिले बाढी पहिरोको प्रकोप निकै बढेका कारण प्रदेशले सिधै सहयोग गर्ने भन्दा पनि पालिकाबाट उद्धार तथा राहतको काम हुने भएकाले थोरै भए पनि सहयोग पुगोस् भनेर सो रकम दिने निर्णय गरिएको हो । प्रदेशभरका जिल्लामा भएको क्षतिको विवरण सङ्कलन गरी आवश्यकतानुसार उद्धार, राहत तथा पुनःस्थापना गरिने उनले जानकारी दिए ।
२०७८ असार २५ गते प्रकाशित
प्रकाशित समय : ०८:०१ बजे
