काठमाडौं । संवैधानिक राजसंस्था र सनातन हिन्दु अधिराज्य सहित बहुदलीय प्रजातन्त्र पुनस्र्थापनाका लागि संयुक्त जनआन्दोलन समितिले चैत्र १५ गते तीनकुने घट्नाको अनुसन्धान गर्न अन्तर्राष्ट्रिय मानव अधिकारवादी संस्था गुहारेको छ ।

शुक्रबार काठमाडौंमा पत्रकार सम्मेलनको आयोजना गर्दैै संस्थाका संयोजक नवराज सुवेदीले संयुक्त राष्ट्र संघ क्षेत्रीय मुख्यालय, जेनेभा, स्विट्जरल्याण्डका उच्चायुक्त भोल्कर टर्कलाई पत्र लेख्दै अनुसन्धानको माग गरिएको जानकारी दिए । पत्रकार सम्मेलनमा उच्चायुक्तलाई लेखिएको पत्र समेत पढेर सुनाइएको थियो ।

मानव अधिकार र जनताको लोकतान्त्रिक अधिकारको विपरीत, कार्यक्रम औपचारिक रूपमा सुरु हुनुभन्दा अगाडि नै सुरक्षा बलहरूले शान्तिपूर्ण कार्यक्रमलाई क्रूरतापूर्वक दमन गरिएको पत्रमा उल्लेख छ । निहत्था नागरिकहरू र शान्तिपूर्ण राजनीतिक भेलामा सुरक्षा बलहरूले गरेको असंगत र मनमानी बलको प्रयोग गरेको पत्रमा जनाइएको छ ।

‘नेपालमा विगतमा धेरै राजनीतिक प्रदर्शन, आन्दोलन, दंगा, राजनीतिक असहमति र राजनीतिक परिवर्तनहरू भएका छन्, तर तीनकुनेमा अत्यधिक बल र बन्दुकको प्रयोग अभूतपूर्व छ । आजसम्म कुनै पनि सरकारले विश्वव्यापी रूपमा स्थापित मानव अधिकारको घोर उल्लङ्घन र लोकतान्त्रिक अधिकारलाई कमजोर पार्ने हदसम्म पुगेको छैन,’पत्रमा उल्लेख छ ।

म मरेपनि आन्दोलन रोकिदैन् : नवराज सुवेदी
सोही क्रममा संयुक्त जनआन्दोलन समितिका संयोजक नवराज सुवेदीले तीनकुने घटनामा मानवता र प्रजातान्त्रिक अधिकारको अपमान भएकाले न्यायिक जाँच गर्नुपर्ने बताएका छन् । शुक्रबार आयोजित पत्रकार सम्मेलनका क्रममा उनले बैशाख १५ गतेदेखि राप्रपाले आन्दोलनको घोषणा गरेकाले सो आन्दोलनमा आफूहरु समाहित हुने पनि बताए ।

‘१५ गते म अर्धमुर्छित अवस्थामा भएँ । घरमा गएपछि तीन दिनसम्म शारीरिक रुपमा कठिन भएको थियो । जुन दिन घटना घट्यो त्यही दिन डिएसपीको टोली घरको बेडमै पुगेर नजरबन्दमा पारेको हो । तर मलाई थुनेर मात्र होइन म मरेपनि राजतन्त्रका लागि लडिरहन्छु,’ उनले भने । उनले राजसंस्थाको स्थापना नभएसम्म, बहुदलीय प्रजातन्त्र स्थापना नभएसम्म, संघीयता खारेज नभएसम्म र हिन्दुराष्ट्र नभएसम्म आन्दोलन नरोकिने जिकिर गरे ।