काठमाडौं । जनमत पार्टीका अध्यक्ष डा.सिके राउतले संसद सरकारले चलाए चल्ने नत्र नचल्ने बाध्यतामा रहेको बताएका छन् ।

शुक्रबार प्रतिनिधिसभाको बैठकमा बोल्दै उनले अन्य केही मुलुकमा संसद आफैपनि व्यवस्थापन गर्नसक्ने क्षमता भएको तर हाम्रोमा संसदको साँचो (चाबी) सरकारले नै बोक्ने गरेको बताए ।
उनले भने, ‘संसद किन खुलिराखेको छैन भनेर चर्चा गर्दैगर्दा शक्ति पृथकीकरणको बहस गर्छौं ।

व्यवस्थापिका, न्यायपालिका, कार्यपालिका छुट्टै चल्न सक्ने भनेर मान्छौ । तर यहाँ संसदको साँचो (चाबी) सरकारले नै बोक्दो रहेछ । सरकारले अधिवेशन नबोलाउदासम्म संसद सुचारु नहुने खालको व्यवस्था छ । अन्य केही मुलुकमा संसद आफैपनि व्यवस्थापन गर्न सक्ने क्षमता राख्दछ ।

सरकारले संसदको साचोे राखिदिएपछि संसद सरकारले चलाए चल्ने नत्र नचल्ने अवस्था बन्यो । पार्टीको कार्यक्रम वा कुनै शीर्ष नेतालाई हाच्छिउँ आउँदा पनि संसद स्थगित हुनुपर्ने बाध्यतामा पुनबिचार गर्नुपर्छ ।

उनले न्यायपालिका र कार्यपालिकाको काममा पनि सरकारले हस्तक्षप गर्ने गरेको आरोप लगाए ।
उनले भने, ‘शक्ति पृथकीकरणको कुरा त गर्छौ तर न्यायलयले पहिले सरकारको फोन कुरेर बस्नुपर्ने अवस्था छ ।

मान्छेलाई हिरासतमा पठाउने कि पुर्पक्षमा पठाउने भनेर सरकारकै आधिकारीकबाट जानकारी लिएर फैसला गर्नुपर्ने अवस्थामा छौं । मान्छेलाई हतकडी लगाएर ७७ जिल्ला घुमाउनुपर्ने हो कि छाड्दिनु पर्ने हो त्यसमा न्यायपालिकामाथि हस्तक्षेप हुन्छ । यसलाई सुधार गर्न आवश्यक छ।’