काठमाडौं । साताको अन्तिम कारोबार दिन नेप्से परिसूचक बढेर बन्द भएको छ।

बिहीबार नेप्से परिसूचक ४.१९ अंक बढेर २६३०.७१ विन्दुमा पुगेको छ। त्यस्तै, आज नेप्सेसँगै कारोबार रकम पनि सामान्य बढेको छ। कारोबारमा आएका मध्ये ७० कम्पनीको मात्र सेयर मूल्य बढेको छ भने १६३ कम्पनीको घटेको छ । ९ कम्पनीको मूल्य भने स्थिर रह्यो ।

अघिल्लो कारोबार दिन अर्थात मंगलबार ५ अर्ब २० करोडको शेयर खरिदबिक्री भएको बजारमा आज ३१० स्टकको ६१ हजार ८३९ पटकको कारोबारमा ५ अर्ब ३२ करोड ९२ लाख ७४ हजार रुपैयाँबराबरको शेयर खरिदबिक्री भएको छ।

आज दुई स्टक आत्मनिर्भर लघुवित्त वित्तीय संस्था र सपोर्ट माइक्रोफाइनान्स वित्तीय संस्थाको शेयर सकारात्मक सर्किट लेभलमा कारोबार भएको छ। त्यस्तै, गुराँस लघुवित्त वित्तीय संस्थाको शेयरमूल्य करिब साढे ७ प्रतिशत बढेको छ ।

कारोबार रकमका आधारमा प्रभु बैंक शीर्ष स्थानमा रहेको छ। सो बैंकको यस दिन ५० करोड ७७ लाख रुपैयाँबराबरको शेयर कारोबार भएको छ। त्यस्तै, जानकी फाइनान्सको २२ करोडभन्दा बढीको शेयर किनबेच भएको छ ।