मुगु-  कर्णाली प्रदेशको जुम्लामा रहेको हिमा गाउँपालिकामा यान्त्रिक कार्यालय स्थापना हुने भएको छ ।

तीन जिल्लाको केन्द्र बिन्दु मानिएको हिमा गाँउपालिकामामा जुम्ला कालिकोट र मुगु तीनवटै जिल्लालाई सेवा प्रवाहमा सजिलो हुनेगरि हिमामा यान्त्रिक कार्यालय स्थापना हुने भएको हो ।
हिमा गाउँपालिका अध्यक्ष लक्ष्मण बहादुर शाहीले सडक विभागका महानिर्देशक तथा यान्त्रिक महाशाखा उप–महानिर्देशकसंग हिमामा यान्त्रिक कार्यालय स्थापनाका लागि माग गरेको मागलाई सरोकारवाला निकायले सम्बोधन गरेका थिए ।

यान्त्रिक कार्यालयलाई आवश्यक पर्ने आठ रोपनी जग्गा गाउँपालिकाले उपलब्ध गराउन सकेमा छिटै यान्त्रिक कार्यालय स्थापना गर्न सकिने सडक विभागले जानकारी दिएको छ ।

यान्त्रिक कार्यालयले आइतबार हिमा गाउँपालिकालाई परिपत्र गर्दै सडक विभागले भनेको छ,‘गाउँपालिकाका अध्यक्ष श्रीमान् लक्ष्मण बहादुर शाहीज्यूबाट सडक विभागका महानिर्देशक र यान्त्रिक महाशाखाका उप–महानिर्देशकज्यूसँग छलफल गरी उक्त गाउँपालिकाको कुनै उपयुक्त स्थानमा यान्त्रिक कार्यालय, जुम्ला स्थापना गर्न अनुरोध भए बमोजिम मुगु, जुम्ला र कालीकोट तीनवटै जिल्लामा सहज ढङ्गले सेवा पुग्नेगरी सोहि गाउँपालिका अन्तर्गत उचित स्थानमा जग्गा उपलब्ध भएमा यान्त्रिक कार्यालय त्यस क्षेत्रमा स्थापना गर्न सकिने व्यहोरा अनुरोध छ ।’
विभिन्न यान्त्रिक उपकरण राख्ने, मर्मत संभार गर्ने आदि कार्य गर्नुपर्ने हुँदा न्यूनतम ८ (आठ) रोपनी जग्गा आवश्यक हुने देखिएकोले उक्त जग्गा पालिकालाई उपलब्ध गराउन समेत अनुरोध गरिएको छ ।

हिमा गाउँपालिका अध्यक्ष लक्ष्मण बहादुर शाहीले हिमामा यान्त्रिक कार्यालय स्थापना हिमाबासीलगायत जुम्ला ,मुगु, कालीकोट र रारा घुम्न आएका अन्य जिल्लाका नागरीकहरुले यान्त्रीक कार्यालयबाट दिन र लिन सक्ने भएकाले जतिसक्दो छिटो हुनेगरी कार्यालय स्थापना गर्नको लागि जग्गा र अन्य कुराको आवश्यक प्रक्रिया अगाडि बढाउनका लागि पहल गरिरहेको समेत अध्यक्ष शाहीले बताएका छन् ।

अध्यक्ष शाहीका अनुसार यान्त्रिक कार्यालयले विकास निर्माणका कार्यमा यान्त्रिक उपकरणहरु उपलब्ध गराउनुका साथै बाढीपहिरोलगायत दैवी प्रकोपमा आकस्मिक मर्मत तथा उद्दारका कार्य गर्न सहयोग पुराउने छ । साथै यान्त्रि कार्यालय स्थापनापछि हिमाको भौतिक पुर्वाधार तथा सामाजिक रुपान्तरणमा समेत सहयोग पुग्ने अपेक्षा गरिएका छन् ।’