विराटनगर । विराटनगरको विराट शिक्षण अस्पतालमा खटिएका चिकित्सक र स्वास्थ्यकर्मीमाथि अज्ञात समूहले हातपात गरेको छ । अस्पतालको आकस्मिक कक्षमा कार्यरत चिकित्सक र स्वास्थ्यकर्मीमाथि कुटपिट गरेको हो ।

आकस्मिक कक्षमा भर्ना भएकाहरूको उपचारमा खटिएका चिकित्सक डा. सुदीप रेग्मी र हेल्थ असिस्टेन्ट निर्दोष बस्नेतमाथि सोमबार राति आक्रमण भएको हो ।

उनीहरु सडक दुर्घटनामा घाइते भएका दुई जनाको उपचारमा खटिएका थिए । अस्पतालका कोभिड–१९ फोकल पर्शन सुनील देवका अनुसार आक्रमणबाट डा. रेग्मी र बस्नेतको टाउको, अनुहार र शरीरका विभिन्न भागमा चोट लागेको छ ।

मोरङ प्रहरीका प्रवक्ता डीएसपी मानबहादुर राईले उपचारका लागि भर्ना भएकी वृद्धाको उपचार गर्न ढिलो गरेको भन्दै बूढीगङ्गा–२ का २८ वर्षीय निश्चल श्रेष्ठ र २५ वर्षीय अनिल श्रेष्ठसहितको समूहले स्वास्थ्यकर्मीमाथि आक्रमण गरेको हो । अहिले उनीहरुलाई पक्राउ गरिएको छ ।

२०७८ जेठ ४ गते प्रकाशित