२५ वैशाख, काठमाडौँ–२६ सांसदमा कोरोना पोजेटिभ देखिएपछि पर्सिका लागि आह्वान गरिएको विशेष अधिवेशन स्थगित हुने सम्भावना बढेको छ । पर्सि विस्वासको मत लिने तयारीमा रहेका प्रधानमन्त्री केपी शर्मा ओलीले आज आकस्मिक क्याबिनेट बैठक बोलाएका थिए । नियमित बैठक सकिएको तेस्रो दिन आज साँझ ५ बजे बिना कुनै बिशेष एजेन्डा बैठक बोलाइएको हो ।

पर्सि सोमबारको लागि आह्वान गरिएको विशेष अधिवेशनका लागि परिस्थिति अनुकूल नदेखेपछि केही महत्वपूर्ण निर्णय लिन क्याबिनेट बैठक बोलाएको हो ।

क्याबिनेटको नियमित बैठक सोमबार या बिहीबार राख्ने गरिएकोमा दुई दिनअघि मात्र बसेको बैठक आज शनिबार अकस्मात बोलाइएको हो । यसरी प्रधानमन्त्री केपी शर्मा ओलीले आकस्मीक बैठक बोलाउँदा संसद्को विशेष अधिवेशन स्थगित गर्न खोजेको अनुमान गरिएको छ ।

बालुवाटार स्रोतले विशेष अधिवेशन स्थगनको सम्भावना बढेको जनाएको छ । स्रोतका अनुसार ‘कोरोना संक्रमितको संख्या बढेको बढ्यै छ,मन्त्रीज्यूहरु नै संक्रमणको शिकार हुनुपरेको अवस्था छ । त्यसैले अधिवेशन स्थगित हुने सम्भावना उच्च छ । यसबारे आजको क्याबिनेटले निर्णय गर्न सक्छ ।’

प्रधानमन्त्री ओलीलाई माधव नेपाल खेमासँग कुरा नमिलेको अबस्थामा जसपाबाट चाहेजति भोट आउने अवस्था नदेखेपछि तत्काल विश्वासको मत नलिने सोचमा पुगेको विपक्षीहरुले आरोप लगाएका छन् । फलस्वरुप बालुवाटार निकट स्रोतले कोरोनालाई कारण देखाए पनि यथार्थमा भने राजनीतिक परिस्थिति प्रतिकूल बन्दै गएपछि ओली अधिवेशन स्थगित गर्ने मनस्थितिमा पुगेको बताएको छ ।

आफैंले बोलाएको अधिवेशनबाट फिर्ता हुन अप्ठेरो हुने भएपछि कोरोना संक्रमणलाई कारण देखाएर ओलीले संसद छेक्ने रणनीति अघि सारेको विपक्षीको आरोप छ ।
यी हुन् कोभिड पोजेटिभ भएका २६ सासंदः

–झलनाथ खनाल
–मुकुन्द न्यौपाने
–मायादेवी न्यौपाने
–पार्वती डिसी चौधरी
–राजेन्द्रप्रसाद गौतम
–नन्दलाल रोका क्षेत्री
–लालबाबु पण्डित
–लक्ष्मणलाल कर्ण
–नरमाया ढकाल
–महेश बस्नेत
–रामबाबु यादव
–गोपालबहादुर बम
–मीता कुमारी चौधरी
–शान्तिमाया तामाङ
–विना कुमारी श्रेष्ठ
–रेनुका गुरुङ
–जुलीकुमारी महतो
–रघुवीर महासेठ
–किसान श्रेष्ठ
–सुरेश कुमार राई
–पुष्पा कुमारी कर्ण कायस्थ
–भानुभक्त ढकाल
–बीना मगर
–भरतकुमार शाह
–प्रमोद शाह
–दिपकप्रकाश भट्ट