२५ वैशाख, काठमाडौँ–नेपाल पत्रकार महासंघ काठमाडौँ शाखाले पत्रकारलाई सरल र सुलभ तरिकाले पीसीआर परीक्षण, कोभिडविरुद्धको खोप र स्वास्थ्य सामग्री उपलब्ध गराउन माग गरेको छ ।

महासंघले समाचार संकलनको क्रममा पत्रकारलाई बढी जोखिम हुने भएकाले पीसीआर परीक्षण, खोप तथा स्वास्थ्य सामाग्री सहज उपलब्ध गराउन माग गरेको हो ।

महासंघ काठमाडौँ शाखाका सचिव महेश्वर गौतमले नयाँ भेरियन्टसहित दोस्रो चरणको कोभिड सङ्क्रमण दिनानुदिन बढ्दै गएको समयमा समाचार सङ्कलनका लागि फिल्डमा खटिने पत्रकारलाई तुलनात्मक रुपमा बढी जोखिम हुने बताउँदै जोखिम कम गर्न सरल र सुलभ तरिकाले पीसीआर परीक्षण, कोभिडविरुद्धको खोप र स्वास्थ्य सामग्री उपलब्ध गराउन माग गरेको बताए ।

साथै शाखाको बैठकको निर्णय सार्वजनिक गर्दै शाखाका सचिव महेश्वर गौतमले यस कोरोना महामारी बारेमा सर्वसाधारणलाई सुसूचित गराईरहेका सञ्चार माध्यम र पत्रकारलाई इन्टरनेट, टेलिफोन र विद्युतजस्ता अत्यावश्यक वस्तुमा सहुलीयत दिनसमेत माग गरेका हुन् ।

शाखाका सदस्यको यसवर्षको नविकरण शुल्क नलिन केन्द्रीय समितिलाई आग्रह गर्ने, सञ्चार गृहलाई श्रमजिवी पत्रकार तथा सञ्चारकर्मीको सेवा सुविधा नियमित गराउन अनुरोध गर्ने निर्णयसमेत बैठकले गरेको शाखा सचिव गौतमले जानकारी दिए । यस्तै, कोभिड जोखिममा परेका पत्रकारको सहयोग र भैपरी आउने अवस्थाको तयारीका लागि शाखाका अध्यक्ष सूर्य सुवेदीको संयोजकत्वमा सात सदस्यीय ‘टाक्स फोर्स’ समिति गठन गर्ने निर्णय भएको छ ।

सङ्क्रमणमा परेका शाखा सदस्यको सङ्ख्या, अस्पताल तथा होम आइसोलेसनमा रहेकाको अवस्था पहिचान गरेर पाँच दिनभित्र सुझाव पेश गर्न शाखाका उपाध्यक्ष रामचन्द्र दुलालको संयोजकत्वमा तीन सदस्यीय समिति बनाइएको छ ।