काठमाडौँ। सरकारले अन्तर्राष्ट्रिय हवाइ सेवा अन्तर्गतको उडान एनएसीलाई साताको १२ र हिमालयनलाई १४ उडान भर्ने अनुमति दिएको छ । कोभिडपछि सञ्चालनमा आएको हवाई सेवा पहिलाको भन्दा उडान संख्या दोब्बर बढाइएको हो । यसअघि सातामा दुई दर्जनमात्रै उडान भर्न अनुमति दिएको नेपाल नागरिक उड्डयन प्राधिकरणले अब ५३ उडान भर्ने तालिका स्वीकृत गरेको छ ।

नयाँ तालिका अनुसार गन्तव्य नथपिए पनि उडान संख्या बढाइएको हो । यसअघि नै उडान खुला गरिएका गन्तव्इमध्ये भारत बाहेकका मुलुकमा हुने उडान संख्या थपिएको प्राधिकरणले जनाएको छ । नयाँ उडान तालिका अनुसार सबैभन्दा धेरै उडान कतारको दोहामा हुने छ ।

दोहाका लागि नेपालबाट राष्ट्रिय ध्वजावाहक नेपाल एयरलाइन्स र कतार एयरवेजले हरेक दिन उडान भर्ने छन् । हिमालय एयरलाइन्सको जहाज भने सोमबार, बुधबार र शनिबार दोहाका लागि उड्ने छ । यूएईको दुबईमा नेपाल एयरलाइन्सले सातामा २ दिन, हिमालय एयरलाइन्सले ३ दिन र फ्लाइ दुबइले ३ दिन उडान गर्ने अनुमति पाएका छन् ।

साउदी अरेबियाको दमाममा भने सातामा ४ उडान भर्ने अवसर हिमालय एयरलाइन्सले पाएको छ । हिमालयनले आइतबार, सोमबार, बुधबार र शुक्रबार दमाम उडाउने छ । हिमालयनलाई सातामा १४ उडान भर्ने अनुमति दिइएको छ । नेपाल एयरलाइन्सलाई सातामा १२ उडान भर्ने अनुमति दिइएको छ ।

मलेसियाको क्वालालाम्पुरमा नेपाल एयरलाइन्सले बुधबार र शनिबार गरि सातामा दुई उडान गर्नेछ । हिमालयनले बिहीबार, शुक्रबार र शनिबार क्वालालाम्पुर उडानको अनुमति पनि पाएको छ । सिंगापुर एयरको जहाज हरेक आइतबार काठमाडौं आउने छ ।

प्राधिकरणले सार्वजनिक गरेको सूचीअनुसार भारतको राजधानी नयाँ दिल्लीमा सातामा दुई उडान मात्र हुनेछ । एयर इण्डियाले सोमबार र नेपाल एयरलाइन्सले बुधबार उडान भर्ने छन् । टर्कीको इस्तानबुलमा टर्किश एयरलाइन्सले सोमबार, बिहीबार र शनिबार जहाज उडाउने छ ।

कुवेतमा आइतबार र शुक्रबारबाहेक साताका पाँचै दिन जजिरा एयरवेजको जहाज उड्ने छ । सलाम एयरले ओमानको मस्कटमा सोमबार, बुधबार र शनिबार गरी कुल तीन उडान गर्ने अनुमति पाएको छ । एयर अरेबियाले आइतबार र मंगलबार आबुधाबी उडाउने तालिका पाएको छ । कोरोना भाइरसको महामारीको अवस्था हेरी तोकिएको तालिकामा थपघट हुनसक्ने प्राधिकरणले बताएको छ ।

२०७८ असार २६ गते प्रकाशित