काठमाडौँ । राधी विद्युत कम्पनीको अध्यक्षमा बिमेशमान पति नियुक्त भएका छन् । कम्पनीको सञ्चालक समितिको असार ७ गते बसेको बैठकले उनलाई अध्यक्ष नियुक्त गरेको हो ।

कम्पनीका अनुसार उनी खारे इन्भेष्टमेन्टबाट प्रतिनिधित्व गर्दै संचालक समितिमा आएका हुन् । यस अघि खारेबाट प्रतिनिधित्व गर्ने अनिल रुंगटा कम्पनीको अध्यक्ष थिए । रुंगटालाई कम्पनीले फिर्ता बोलाएर बिमेशमन पतिलाई संचालकमा पठाएको हो ।
कम्पनीको साधारणसभा २९ गते

कम्पनीले असार २९ गते साधारण सभा पनि आह्वान गरेको छ । कम्पनीका अनुसार सभा भर्चुअल माध्यमबाट हुने छ । सभाबाट लाभांश र हकप्रद सहितका विभिन्न प्रस्ताव पेश हुने हुनेछन् । कम्पनीले ३६.५० प्रतिशत बोनस शेयर वितरण गर्ने प्रस्ताव गरेको छ। साधारणसभाले पारित गरेपछि उक्त लाभांश लगानीकर्तामा वितरण हुने छ। त्यस्तै कम्पनीले बोनस वितरणपछि १४७.५२ प्रतिशत हकप्रद निष्काशनको प्रस्ताव गरेको छ। साधारणसभाले पारित गरेपछि र नेपाल धितोपत्र बोर्ड स्वीकृति दिएपछि कम्पनीले हकप्रद निष्काशन गर्ने छ ।

हाल कम्पनीको चुक्ता पुंजी ४७ करोड ३५ लाख ५६ हजार ५ सय रहेको छ । कम्पनीले बोनस वितरण पश्चात चुक्ता पुंजी ६४ करोड ६४ लाख ४ हजार ६ सय २२ पुग्ने छ ।

साधारणसभामा आर्थिक वर्ष ७६–७७ को प्रतिवेदन छलफल गरि पारित गर्ने, वासलात र अन्य वित्तीय विवरण छलफल गरि पारित गर्ने, आर्थिक वर्ष ७७र७८ को लागि लेखापरिक्षक नियुक्त गरि निजको पारिश्रमिक तोक्ने सामान्य प्रस्ताव पेश हुने छन् । त्यस्तै प्रबन्धपत्र र नियमावली संशोधन गर्ने, नियामक निकायबाट संशोधनको लागि थप निर्देशन आएमा सोहि अनुसार गर्ने अख्तियारी संचालक समितिलाई दिने विशेष प्रस्ताव पेश हुने छन् ।

कम्पनीले साधारणसभा प्रयोजनको लागि असार १५ गते बुक क्लोज गर्ने निर्णय गरेको छ । असार १४ गतेसम्म कायम शेयरधनीले मात्र सभामा भाग लिन र प्रस्तावित लाभांश पाउँन सक्ने छन् ।

२०७८ असार ९ गते प्रकाशित