जनकपुरधाम । प्रदेश नं. २ का ४ मन्त्री बर्खास्त भएका छन् । प्रदेश सरकारले पूर्वराजपाबाट भौतिक पूर्वाधार विकासमन्त्रीसहित चार जनालाई बर्खास्त गरेको हो ।

प्रदेश २ का मुख्यमन्त्री मो.लालबाबु राउत गद्दीले पूर्वराजपाबाट मन्त्री भएका सोनल, समाजिक विकास राज्यमन्त्री अभिराम शर्मा, भौतिक पूर्वाधार विकास राज्यमन्त्री डा.डिम्पल झा र उद्योग, पर्यटन, वन तथा वातावरण राज्यमन्त्री सुरेश मण्डललाई सरकारबाट बर्खास्त गरिएको हो ।
मुख्यमन्त्री लालबाबु राउतले जसपाको ठाकुर–महतो समूहमा रहेका सोनल, शर्मा, झा र मण्डललाई हटाइएको पत्र आइतबार अबेर राति प्रदेश प्रमुख डा राजेश झाको सचिवालयमा दर्ता गराएका थिए ।
प्रदेश प्रमुख झाले मुख्यमन्त्री कार्यालयबाट मन्त्रिमण्डलमा हेरफेर गरिएको पत्र प्राप्त भएको पुष्टि गरेका छन् । प्रदेश प्रमुखको सचिवालयले राति नै जारी गरेको विज्ञप्तिअनुसार मुख्यमन्त्री राउतलाई भौतिक पूर्वाधार मन्त्रालयको सम्हाल्ने गरी जिम्मेवारी तोकिएको छ ।

विजयकुमार यादवलाई पूर्ववत् नै आर्थिक मामिला तथा योजना , ज्ञानेन्द्रकुमार यादवलाई आन्तरिक मामिला तथा कानून, शैलेन्द्र साहलाई भूमि व्यवस्था, कृषि तथा सहकारी , नवलकिशोर साहलाई सामाजिक र रामनरेश यादवलाई उद्योग मन्त्रालय कायम रहेको विज्ञप्तिमा उल्लेख छ ।
प्रदेश २ मा जसपा (समाजवादी ३० र राजपा २५), कांग्रेस १९ र माओवादी केन्द्रका ८ जना सांसद रहेका छन् । अहिले प्रदेश २ मा सरकार निर्माणका लागि ५३ सांसदको आवश्यकता रहेको छ ।

२०७८ जेठ २४ गते प्रकाशित