कम्पनी दर्ता र पुँजी वृद्धि गर्दा लाग्ने शुल्क छुट दिने सरकारको निर्णय
वि.सं.२०८० साउन ३ बुधवार
काठमाडौं। सरकारले मन्त्रिपरिषद् बैठकका निर्णयहरू सार्वजनिक गरेको छ। आज (बुधबार) बिहान बसेको मन्त्रिपरिषदका निर्णयहरू सार्वजनिक गर्दै सरकारका प्रवक्ता एवं सञ्चार तथा सूचना प्रविधिमन्त्री रेखा शर्माले प्रधानमन्त्रीको इटाली भ्रमण स्वीकृत गर्ने निर्णय भएको जानकारी गराइन्।
संयुक्त राष्ट्रसंघको खाद्य तथा कृषि संगठनको मुख्यालय इटालीमा आयोजना हुने ‘युनाइटेड नेसन्स फुड सिस्टम, २०२३ स्टकटेकिङ मोमेन्ट’मा सहभागी हुन प्रधानमन्त्री प्रचण्ड त्यसतर्फ जाने उनले जानकारी गराइन्।
प्रधानमन्त्री नेतृत्वको नेपाली प्रतिनिधिमण्डलमा कृषि तथा पशुपक्षी विकासमन्त्री डा. वेदुराम भुसाललगायतको प्रतिनिधित्व रहने उनले बताइन्। बैठकले कम्पनी दर्ता र पुँजी वृद्धि गर्दा लाग्ने शुल्क तथा दस्तुर छुट तथा परिमार्जनसम्बन्धी सूचना प्रकाशन गर्ने निर्णय गरेको प्रवक्ता शर्माले बताए।
त्यस्तै बैठकले सहिद गंगालाल राष्ट्रिय हृदय केन्द्रको सञ्चालक समितिको सदस्यमा सोही अस्पतालका चिकित्सक डा. रवि मल्ललाई नियुक्त गरेको मन्त्री शर्माले जानकारी दिइन्।
प्रकाशित समय : ११:४८ बजे
