साउदी अरेबियाको तेल तथा ग्यास उत्पादक ‘अरामको’ अमेरिकी ‘एप्पल’ लाई उछिन्दै संसारकै धनी कम्पनी भएको छ।

दुई वर्षसम्म संसारकै धनी कम्पनीका रूपमा रहेको एप्पललाई अरामकोले उछिनेर उपाधि आफ्नो नाममा पारेको हो।

बिबिसीका अनुसार अहिले लगानीकर्ताहरूले सूचना-प्रविधि कम्पनीहरूबाट आफ्नो सेयर बेचेर कम जोखिम भएका कम्पनीहरूमा लगानी गरिरहेका छन्। संसारभर तेल र ग्यासजन्य पदार्थको माग बढेका बेला लगानीकर्ताहरूको आकर्षण अरामको जस्ता कम्पनीमा देखिएको छ।

एप्पलको सेयर मूल्य खस्किँदै गइरहेको छ। बुधबारको तथ्यांकअनुसार एप्पलको सेयर बजार मूल्य बीस खर्ब ३७ अर्ब अमेरिकी डलर छ।

अरामकोको भने बीस खर्ब ४२ अर्ब डलर पुगेको बिबिसीले लेखेको छ। यसअघि सन् २०२० मा पनि अरामको संसारकै धनी कम्पनी बनेको थियो।

साउदीका शाही परिवारको स्वामित्वमा रहेको अरामको पहिलेदेखि नै धनी कम्पनी मानिन्थ्यो। तर यसले पहिले सार्वजनिक सेयर जारी नगरेकाले एप्पल नै लामो समय धनीको सूचीमा परिरह्यो।

सन् २०१९ मा अरामको सेयर बजारमा आएसँगै यसले एप्पललाई चुनौती दिएको थियो। सेयर बजारमा प्रवेश गर्दा अरामकोले आफ्नो सम्पत्ति बीस खर्ब डलर भएको बताएको थियो।

कोरोना महामारीपछि विश्वका थुप्रै ठूला कम्पनीमा प्रभाव पर्‍यो। एप्पलले भने कोरोनाताका राम्रो व्यापार गरेको थियो। उसको सेयर भाउ उकासिँदै तीस खर्ब डलर सम्पत्ति भएको पहिलो कम्पनी बन्न सफल भएको थियो।

तर पछिल्लो समय एप्पलको बजार मूल्य क्रमशः कम हुँदै गयो। उता तेल र ग्यासजन्य पदार्थको भने बजार एकदमै धेरै बढ्यो। योसँगै अरामको कम्पनीको सम्पत्ति पनि बढेको सिएनएनले लेखेको छ।