काठमाडौँ । सांग्रिला डेभलपमेन्ट बैंकले चालु आर्थिक वर्षका लागि लाभांश घाषणा गरेको छ । बैंकले अघिल्लो आर्थिक वर्षमा दिएको दोब्बर लाभांश दिन लागेको हो । बैंकको असोज २० गते मंगलबार बसेको सञ्चालक समितिको २७७ औं बैठकको निर्णय अनुसार बैंकले आर्थिक वर्ष २०७७÷२०७८ को मुनाफाबाट चुक्ता पूँजीको १०.५२६३ प्रतिशत लाभांश वितरण गर्न लागेको छ ।

प्रस्तावित लाभांशलाई वितरण गर्न राष्ट्र बैंकले अनुमति दिएमा बैंकले चुक्ता पूँजीको १० प्रतिशतका दरले हुन आउने २७ करोड ३६ लाख ९७ हजार २४२ रुपैयाँ बराबरको बोनस शेयर र कर प्रयोजनका लागि ०.५२६३ प्रतिशतले हुन आउने १ करोड ४४ लाख ५ हजार ११८ रुपैयाँ बराबरको नगद लाभांश गरि कुल १०.५२६३ प्रतिशत लाभांश वितरण गर्नेछ ।

अघिल्लो आव २०७६–७७ बाट बैंकले चुक्ता पूँजीको ५ प्रतिशत बोनस र कर प्रयोजनका लागि ०.२५६ प्रतिशत मात्र लाभांश वितरण गरेको थियो ।

बैंकले प्रस्ताव गरेको गत आवको उक्त लाभांश नेपाल राष्ट्र बैंकले स्वीकृति दिएपछि कम्पनीको आगामी १७ औँ साधारणसभाले पारित गरेपछि मात्र लगानीकर्तामा वितरण हुनेछ ।

२०७८ असोज २० गते प्रकाशित