काठमाडौं । आइएमई समूहले कैलालीको चिसापानी क्षेत्रमा निर्माण गरिरहेको जालपादेवी केबलकार आगामी दुई महिनाभित्र सञ्चालनमा ल्याउने तयारी गरेको जनाएको छ । कम्पनीका अनुसार आयोजनाको निर्माण कार्य अन्तिम चरणमा पुगेको छ र निर्धारित समयमै सञ्चालनमा ल्याइने लक्ष्य राखिएको छ ।
नेपाल उद्योग वाणिज्य महासंघका निवर्तमान अध्यक्ष तथा जालपादेवी केबलकार प्रालिका अध्यक्ष चन्द्रप्रसाद ढकालले निजी क्षेत्रले जिम्मा लिएका परियोजनाहरू समय, लागत र गुणस्तरमा सम्पन्न गर्दै आएको उल्लेख गर्दै जालपादेवी केबलकार पनि तय गरिएको समयमै सञ्चालनमा आउने बताए । ‘निजी क्षेत्रले जिम्मा लिएका परियोजनाहरू तोकिएको समय, बजेट र गुणस्तरमा सम्पन्न गर्दै आएको छ,’ ढकालले भने,‘हामीले करिब ११ महिना अघि यस आयोजनाको निर्माण सुरु गरेका थियौं र अब निर्धारित समयमै सञ्चालनमा ल्याउने तयारीमा छौं ।’
आइएमई समूहले कैलालीको लम्की चुहा नगरपालिका–३ चिसापानीदेखि मोहन्याल गाउँपालिका–७ राजकाँडासम्म ३.१ किलोमिटर लामो केबलकार निर्माण गरिरहेको छ । करिब पाँच अर्ब रुपैयाँ लगानी रहेको यस परियोजनामा बटम स्टेशनमा होटल, क्यासिनो, ब्यांक्वेट हललगायत संरचना निर्माण गरिनेछ ।
त्यसैगरी, टप स्टेशनमा रिसोर्ट, मन्दिर, स्काई वाक, वाकिङ ट्रेल, रेष्टुरेन्ट तथा बाल उद्यानलगायत पर्यटकीय पूर्वाधार विकास गरिने कम्पनीले जनाएको छ । अध्यक्ष ढकालले पर्यटन पूर्वाधारमा लगानी विस्तार नगरी नेपालले अपेक्षित आर्थिक रूपान्तरण हासिल गर्न नसक्ने उल्लेख गर्दै पर्यटन क्षेत्रले आर्थिक, सांस्कृतिक र सामाजिक क्षेत्रमा ठूलो परिवर्तन ल्याउन सक्ने बताए । उनले पर्यटन पूर्वाधारमा लगानी बढाउन सके पर्यटकको बसाइ अवधि लम्ब्याउन, विदेशी मुद्रा आर्जन गर्न, रोजगारी सिर्जना गर्न तथा राजस्व वृद्धि गर्न सहयोग पुग्ने धारणा राखे ।
ढकालले केबलकार पर्यटन सर्किट निर्माण गर्ने आफ्नो दीर्घकालीन लक्ष्य रहेको बताउँदै जालपादेवी केबलकार त्यस दिशामा महत्वपूर्ण परियोजना भएको उल्लेख गरे । साथै, स्थानीय समुदाय, राजनीतिक दल तथा सरकारी निकायबाट प्राप्त सहयोग परियोजना सफलताको प्रमुख आधार रहेको उनको भनाई थियो ।
लुम्बिनी, कर्णाली र सुदूरपश्चिम प्रदेशको पर्यटकीय केन्द्रका रूपमा विकास भइरहेको कर्णाली चिसापानी पुल नजिकै रहेको यो आयोजना भारतीय सीमाबाट करिब दुई घण्टाको दूरीमा रहेकाले भारतीय पर्यटकका लागि पनि आकर्षक गन्तव्य बन्ने विश्वास गरिएको छ ।
