काठमाडौं । नेपाल उद्योग वाणिज्य महासंघ (एफएनसीसीआई) को नयाँ नेतृत्वका लागि जारी निर्वाचन प्रक्रिया अन्तर्गत आज उम्मेदवारहरूको अन्तिम नामावली प्रकाशन गरिएको छ। निर्वाचन तालिका अनुसार तोकिएको समयभित्र ५ जना उम्मेदवारले आफ्नो नाम फिर्ता लिएपछि निर्वाचन समितिले अन्तिम सूची सार्वजनिक गरेको हो।

उम्मेदवारी फिर्ता लिनेहरू

निर्वाचन समितिका मुख्य निर्वाचन अधिकृत लीलामणि पौडेलका अनुसार विभिन्न कलष्टरबाट उम्मेदवारी दिएका निम्नलिखित व्यक्तिहरूले नाम फिर्ता लिएका छन्:

• सञ्जिव बहादुर कोईराला: जिल्ला/नगर उपाध्यक्ष

• अनुपम राठी: एसोसिएट्स सदस्य

• प्रह्लाद दाहाल: वस्तुगत सदस्य

• शंकर बहादुर बोगटी: सुदूरपश्चिम प्रदेश सदस्य

• शान्ति प्रसाद शर्मा: कर्णाली प्रदेश सदस्य

“आज बिहान ११ बजेदेखि दिउँसो ३ बजेसम्म मनोनयन फिर्ता लिने समयसीमा तोकिएको थियो। सो अवधिमा पाँच जनाले आफ्नो उम्मेदवारी फिर्ता लिएका हुन्,” मुख्य निर्वाचन अधिकृत पौडेलले जानकारी दिए।

निर्वाचनको तयारी अन्तिम चरणमा

उम्मेदवारी फिर्ताको प्रक्रिया सकिएसँगै निर्वाचन समितिले आजै उम्मेदवारहरूको अन्तिम नामावली प्रकाशन गरेको छ। यससँगै महासंघको नयाँ कार्यसमिति चयनका लागि चुनावी प्रतिस्पर्धाको चित्र स्पष्ट भएको छ।

अब चुनावी मैदानमा रहेका उम्मेदवारहरूबीच आगामी कार्यकालका लागि मतदान हुनेछ। महासंघको विधान अनुसार वरिष्ठ उपाध्यक्ष नै आगामी कार्यकालका लागि स्वतः अध्यक्ष हुने व्यवस्था रहेको छ भने अन्य पदहरूका लागि निर्वाचन हुने गर्दछ।