काठमाडौं । चालु आर्थिक वर्षको पहिलो त्रैमासमा बैंकहरुको नाफामा गिरावट आएको छ । बैंकहरुले शुक्रबार प्रकाशन गरेको वित्तीय विवरण अनुसार नाफा १८.७८ प्रतिशत घटेको छ ।चालु आवको तीन महिनामा वाणिज्य बैंकहरुले १३ अर्ब १४ करोड ९८ लाख रुपैयाँ खुद नाफा कमाएका छन् । जबकि, गत आवको सोही अवधिमा ती बैंकहरुले १६ अर्ब १८ करोड ९४ लाख रुपैयाँ खुद नाफा कमाएका थिए ।

समिक्षा अवधिमा पाँच वटा बैंकको मात्रै नाफा वृद्धि भएको छ । सिटिजन्स बैंकले त झन २२ करोड ४ लाख रुपैयाँ नोक्सानी व्यहोरेको छ । समिक्षा अवधिमा ५ वटा बैंकले मात्र नाफा १ अर्ब नघाएका छन्। पहिलो त्रैमासमा सर्वाधिक नाफा कमाउनेको पहिलो सूचीमा ग्लोबल आइएमई बैंक देखिएको छ । बैंकले तीन महिनामा १ अर्ब ८५ करोड ८६ लाख रुपैयाँ खुद नाफा कमाएको छ । यो नाफा गत आवको तुलनामा २२.९१ प्रतिशत धेरै हो । गत वर्ष बैंकले १ अर्ब ५१ करोड २१ लाख रुपैयाँ खुद नाफा कमाएको थियो ।

दोस्रो धेरै नाफा भने नबिल बैंकले १ अर्ब ७५ करोड ६९ लाख रुपैयाँ कमाएको छ ।यद्यपि बैंकको नाफामा १४.५६ प्रतिशत गिरावट आएको छ । प्राय: पहिलो सूचीमा पर्ने नबिल यसपाली पनि दोस्रो स्थानमा पुगेको छ ।

यता, प्राइम बैंकले नाफाको आधारमा आफ्नो पोजिशन तेस्रो स्थानमा ल्याएको छ । समिक्षा अवधिमा प्राइमले १ अर्ब २५ करोड ८४ लाख रुपैयाँ नाफा कमाएको छ । यद्यपि, गत वर्षको तुलनामा भने २.२० प्रतिशत कमी हो ।

चौंथो सूचीमा रहेको एभरेष्ट बैंकले १ अर्ब १७ करोड ९२ लाख रुपैयाँ खुद नाफा कमाएको छ । एभरेष्टको नाफा भने ४.५७ प्रतिशत बढेको हो ।

अर्ब क्लबको पाँचौं स्थानमा रहेको कुमारीले पनि तीन महिनामा १ अर्ब ५ करोड ६५ लाख रुपैयाँ खुद नाफा कमाएको छ । कुमारीको नाफा २ प्रतिशत घटेको छ ।

पहिलो त्रैमासमा सर्वाधिक नाफा राष्ट्रिय वाणिज्य बैंकले २५.७२ प्रतिशत बढाएर ५ करोड ८७ लाख रुपैयाँ पुर्याएको छ । जबकि, गत वर्षको सोही अवधिमा बैंकले १५ करोड १३ लाख रुपैयाँ मात्रै नाफा कमाएको थियो । नाफा वृद्धिदरमा ग्लोबल आइएमई दोस्रो स्थानमा छ ।

समिक्षा अवधिमा सानिमा बैंकको नाफा १३.८६ प्रतिशत र एनआइसी एशियाको १०.५३ प्रतिशत वृद्धि भएको छ । समिक्षा अवधिमा यी दुई बैंकले क्रमश: ४५ करोड ४९ लाख र १२ करोड २१ लाख रुपैयाँ खुद नाफा कमाएका छन् ।

समिक्षा अवधिमा कृषि विकास बैंकको नाफा सर्वाधिक ९७ प्रतिशत घटेर ५७ लाख ३८ हजार रुपैयाँ कायम भएको छ । यता, नेपाल इन्भेष्टमेन्ट मेगा बैंकको नाफा पनि ९६.९२ प्रतिशत, प्रभूको ४६.३३ प्रतिशत, नेपाल एसबिआइको ३८.४३ प्रतिशत, लक्ष्मी सनराइजको ३८.०४ प्रतिशत, एनएमबिको २०.०४, स्ट्याण्डर्ड चार्टर्डको १९.७२, माछापुच्छ्रेको १६.९५, सिद्धार्थको १५.१८, हिमालयनको ३.३१ र नेपाल बैंकको २.२० प्रतिशत घटेको छ ।