काठमाडौं । हिमालयन एभरेष्ट इन्स्योरेन्सको ३१ औं वार्षिक साधारणसभा सम्पन्न भएको छ। साधारणसभा अध्यक्ष महेन्द्र कृष्ण श्रेष्ठको अध्यक्षतामा काठमाडौंको शंखमुलमा सम्पन्न भएको थियो।

साधारणसभा र लाभांश वितरणको प्रयोजनका लागि कम्पनीको शेयरधनी दर्ता २०८१ फागुन १५ गतेका लागि बन्द गरिएको थियो। २०८१ फागुन १४ गतेसम्म कायम शेयरधनीले साधारणसभामा उपस्थित भएका थिए।

उक्त साधारणसभाबाट आव २०८०/०८१ को सञ्चालक समितिको वार्षिक प्रतिवेदन, वासलात, नाफा नोक्सान हिसाब, नगद प्रवाह विवरण, ईक्विटीमा भएको परिवर्तन आदि पारित गर्नुका साथै सोही आव को मुनाफाबाट शेयरधनीहरूलाई चुक्ता पूँजीको ८.७५ प्रतिशतका दरले हुन आउने रकम २१ करोड ८७ लाख ६३ हजार ७७३ रुपैयाँ बराबरको नगद लाभांश समेत पारित गरियो।

यसै साधारणसभाबाट आव २०८१/०८२ को लागि कम्पनीको बाह्रय लेखापरीक्षकको नियुक्ति र पारिश्रमिक समेत लेखापरीक्षण समितिले सिफारिस गरिए बमोजिम अनुमोदन गरियो।

साधारणसभालाई सम्बोधन गर्दै कम्पनीका अध्यक्ष श्रेष्ठले कम्पनीले प्रविधि र प्रतिभामा वर्तमानमा गरेको लगानीको माध्यमबाट दीर्घकालीन रूपमा श्रोतहरूको परिचालन गरि दिगो लाभ लिन सकिनेमा विश्वास लिएको बताए। साथै उनले सबै सरोकारवालाहरूको विश्वास र सहयोगबाट कम्पनीलाई गतिशील बनाउँदै निर्जीवन बीमा क्षेत्रमा अग्रणी रूपमा स्थापित हुनेमा आफू पूर्ण रूपमा विश्वस्त रहेको पनि उल्लेख गरे।

साधारणसभामा स्वागत मन्तव्य राख्दै कम्पनीका प्रमुख कार्यकारी अधिकृत अन्जु श्रेष्ठले नविनतम प्रविधिको प्रयोगबाट निर्जीवन बीमाका ग्राहकहरूलाई गुणस्तरीय सेवा प्रदान गर्दै राष्ट्रिय तथा अन्तर्राष्ट्रिय स्तरमै प्रतिष्ठित संस्था बनाउन आफ्नो अधिकतम प्रयास रहने बताए।