काठमाडौं । कोरियन अटो निर्माता हुन्डाई विश्वको तेस्रो ठूलो अटो उत्पादक वनेको छ ।

हुन्डाईले अमेरिकन अटो निर्माता जनरल मोटर्स र स्टालान्टिसलाई पछि पार्दै पहिलो पटक विश्वको तेस्रो ठूलो अटो उत्पादक वनेको हो ।

हुन्डाई भन्दा अगाडी अव टोयोटा र फक्स्वागन मात्र रहेका छन् । हुन्डाईले ५५ वर्षअघि कोरियाबाट सवारी साधन उत्पादन थालेको थियो ।

सन् २०२१ मा उत्पादन भई बिक्री भएको कुल सवारीसाधनको संख्यालाई आधार मान्दा हुन्डाइले यस्तो उपलव्धी हाँसिल गरेको हो ।

सो वर्ष हुन्डाइले कुल ६६ लाख सवारीसाधन बिक्री गर्दा पहिलो स्थानमा रहेको टोयोटाले १ करोड ५ लाख र फक्सवागनले ८९ लाख सवारीसाधन बिक्री गरेका थिए ।

यो वर्ष कम्पनीको बिक्री अझै बृद्धि हुने अनुमान लगाइएको छ ।

जसका कारण पहिलो र दोस्रो स्थानमा रहेको टोयोटा र फक्सवागनसंगको दुरी अझै कम हुने र अहिलेकै रफ्तार कायम रहिरहे सन् २०२३ पछि फक्सवागनलाई पछि पार्दै दोस्रो स्थानमा उक्लन सक्ने आँकलन गरिएको छ ।

यो वर्ष कम्पनीको आम्दानी २१ प्रतिशतले बृद्धि हुने आँकलन गरिएको छ ।

हुन्डाई मोटर्सका उत्पादनको माग उत्तर अमेरिकी मुलकमा बृद्धि भएपछि यस्तो उपलब्धी हाँसिल गर्न सफल भएको हो । अघिल्लो वर्ष अमेरिका, क्यानाडा र मेक्सिकोमा मात्र कम्पनीले कुल बिक्रीको २१ प्रतिशत हिस्सा बिक्री गरेको थियो ।

न्यू इनर्जी भेइकलमा समेत अर्वौ डलर लागनी गर्ने घोषणा गरेको हुन्डाइको आगामी दिनमा बिक्री अझै वढेर जाने निश्चित प्राय वनेको छ ।