अरुण काबेलीको लाभांश सुरक्षित गर्ने आइतवारसम्म
वि.सं.२०७८ भदौ ११ शुक्रवार
काठमाडौं । अरुण काबेली पावरको लाभांश सुरक्षित गर्ने अन्तिम दिन आइतवारसम्म रहेको छ ।
कम्पनीले लाभांश वितरण र साधारण सभा प्रयोजनको लागि भदौ १५ गतेदेखि २५ गतेसम्म बुक क्लोज गरिएको छ । भदौ १४ गते सार्वजनिक विदा परेकाले आइतवार भदौ १३ गतेसम्म कायम शेयरधनीले कम्पनीको लाभांश पाउनेछन् ।
कम्पनीले गत आवको मुनाफाबाट १७ प्रतिशत बोनस शेयर र शून्य दशमलव ८९ प्रतिशत नगद लाभांश कर प्रयोजनको लागि वितरण गर्ने निर्णय गरेको छ ।
साथै कम्पनीले १७ प्रतिशत बोनस शेयर वितरण पछि कायम चुक्तापूँजीको शतप्रतिशत अर्थात् १ : १ अनुपातमा हकप्रद शेयर निष्कासन गर्ने प्रस्ताव पनि गरेको छ । यी प्रस्ताव पारितका लागि कम्पनीले आगामी भदौ २६ गते साधारण सभा बोलाएको हो ।
कम्पनीले सभा बिहान ११ बजे कम्पनीको प्रधान कार्यालय ट्रेड टावर नेपाल थापाथलीबाट जुम माध्यमबाट गर्ने जानकारी गराएको छ ।
२०७८ भदौ ११ गते प्रकाशित
प्रकाशित समय : १३:०० बजे
