काठमाडौं । नेपाल अटोमोबाइल्स इम्पोर्टर्स एन्ड म्यानुफ्याक्चरर्स एसोसिएसन (नाइमा)को आयोजनामा साउन २६ गतेदेखि सञ्चालित ‘नाइमा नेपाल मोबिलिटी एक्स्पो २०२६’ आइतबार सफलतापूर्वक सम्पन्न भएको छ।

सवारी साधन पारखी, उद्यमी तथा सर्वसाधारणको उल्लेख्य र उत्साहजनक सहभागिताका साथ सम्पन्न यस एक्स्पोले समग्र अटोमोबाइल बजारमा नयाँ तरंग सिर्जना गरेको छ। नाइमाका अनुसार यस वर्षको मोबिलिटी एक्स्पो विगतका संस्करणहरूको तुलनामा भव्य, सुव्यवस्थित र अत्यन्तै सफल बनेको छ।

एक्स्पोको उपलब्धि र अवलोकनकर्ताको अवस्थाबारे जानकारी दिँदै नाइमाकी अध्यक्ष ऋतुसिंह वैद्यले अघिल्लो संस्करणमा करिब १ लाख दर्शकले मेला अवलोकन गरेकोमा यस पटक सो सङ्ख्या उल्लेख्य रूपमा वृद्धि भई करिब १ लाख ८० हजार पुगेको बताइन्।

मेला अवधिभर नयाँ प्रविधिका सवारी साधनहरूबारे जानकारी लिने, उपभोक्ताको चासो देखाउने तथा बुकिङ गर्ने क्रम निरन्तर चलेकाले यसले समग्र अटोमोबाइल बजारप्रति सकारात्मक मनोविज्ञान प्रतिबिम्बित गरेको उनको भनाइ छ।

साथै, नाइमाले नीति निर्माण तथा सम्बन्धित निकायहरूसँग निरन्तर सहकार्य गर्दै आएको उल्लेख गर्दै आगामी दिनमा अटो क्षेत्रको समग्र विकास, विस्तार र सुधारमा संस्थागत योगदानलाई थप सुदृढ बनाउँदै लैजाने प्रतिबद्धतासमेत व्यक्त गरिन्।