काठमाडौं । भृकुटीमण्डपको प्रदर्शनी हल सिँगारिएका नयाँ गाडीहरू र तिनलाई नियाल्ने उत्सुक अवलोकनकर्ताहरूले भरिभराउ छ । नेपाल अटोमोबाइल्स इम्पोर्टस् एण्ड म्यानुफ्याक्चरर्स एसोसिएसनको आयोजनामा भइरहेको नेपाल मोबिलिटी एक्स्पो २०२४ ले सुस्ताएको अटोमोबाइल क्षेत्रमा नयाँ उत्साह थपेको छ ।

एक्स्पोमा १८ लाख रुपैयाँका साना इभीदेखि ४ करोड रुपैयाँ सम्मका विलासी प्रिमियम एसयूभीहरू प्रदर्शनीमा राखिएका छन् । नाईमा एक्स्पोले ग्राहकलाई गाडी मात्र देखाएको छैन । कुन बजेटमा कुन ब्रान्ड र कस्तो फिचर पाइन्छ भन्ने तुलनात्मक अध्ययन गर्ने अवसर समेत दिएको छ । विशेष गरी विद्युतीय सवारी (ईभी) मा देखिएको तीव्र प्रतिस्पर्धाले नेपाली बजार अब ब्रान्डबाट फिचर र रेन्जको प्रतिस्पर्धामा प्रवेश गरेको सन्देश दिएको छ ।

डेन्जाको बी ५ र एमजी मजेस्टर २ करोड माथि
उच्च वर्ग र सौखिन ग्राहकका लागि एक्स्पोमा १ करोड रुपैयाँभन्दा माथिका विलासी एसयूभीहरूको पनि राम्रो उपस्थिति छ । जसमा विलासी सेगमेन्टमा सबैभन्दा महँगो मध्येको डेन्जाको बी ५ र बी ८ को मूल्य क्रमशः २ करोड १७ लाख र ३ करोड ८० लाख रुपैयाँ रहेको छ ।

गोल्छाको जीओ अटोमोबाइल्सले एमजी मजेस्टर २ करोड ५० लाख रुपैयाँ मूल्यसहित सार्वजनिक गरेको छ । टोयोटाको ¥याम फोर र हाइलक्स मोडलहरू १ करोड ५५ लाख र २ करोड १३ लाख रुपैयाँको मूल्यमा प्रतिस्पर्धामा छन् ।

बिआईसिको बीजे ३०ई को मूल्य करिब १ करोड २० लाख रुपैयाँ राखिएको छ । हुन्डाईको बहुचर्चित आयोनिक ५ को मूल्य पनि १ करोड २० लाख रुपैयाँ नै छ ।

एमजीले आफ्नो प्रिमियम एसयूभी मार्भल आर र एचएस पिएच इभी १ करोडदेखि १ करोड २० लाख रुपैयाँसम्मको रेन्जमा ल्याएको छ ।

५० देखि ७० लाखमा ११ वटा मोडल
५० देखि ६० लाख रुपैयाँको सेगमेन्टमा ११ वटा मोडलहरू एकअर्कासँग भिडिरहेका छन् । ओमोडा ई ५ को मूल्य ५६ लाख ९९ हजार र महिन्द्रा एक्सयूभी ४०० ६० लाख रुपैयाँको हाराहारीमा उपलब्ध छ । यो सेगमेन्टमा चिनियाँ ब्रान्डहरूबीच कडा प्रतिस्पर्धा देखिएको छ ।

बुलिङ डारियोन ५६ लाख, निसान टेक्टन ५३ लाख ९१ हजार, होङ्छी ईएचएस ४ मोडल ५९ लाख ९९ हजार र ग्रेट वालको हावल जोयलन प्रो म्याक्स ५९ लाख ९९ हजार रुपैयाँमा उपलब्ध छन् ।

३० देखि ५० लाखमा चिनिया ब्राण्डकै बढी प्रतिस्पर्धा
नेपाली बजारको सबैभन्दा हट सेगमेन्ट मानिने ३० देखि ५० लाखको रेन्जमा ठूला ब्रान्डहरूबीच ठूलो प्रतिस्पर्धा देखिएको छ । जसमा प्रिमियम सेगमेन्टमा चिनियाँ, भारतीय र जापानी ब्रान्डका गाडीहरूबीच ग्राहक तान्ने होडबाजी नै चलेको देखिन्छ ।

नेपालमा पहिलोपटक भित्रिएको चेरी क्युको ३० लाख ९९ हजारदेखि ३२ लाख ९९ हजार रुपैयाँको रेन्जमा उपलब्ध छ । टाटा पन्च इभीको फेसलिफ्ट भर्सन ३३ लाख ९९ हजारदेखि ३७ लाख ९९ हजार रुपैयाँसम्ममा उपलब्ध छ । बिवाइडीको एटो ३ को मूल्य ३० लाख ७५ हजारदेखि ३४ लाख १० हजार रुपैयाँसम्म राखिएको छ ।

४० देखि ५० लाखको सेगमेन्टमा बिवाइडी एटो २ को दुई भेरियन्ट ४५ लाख ९६ हजार र ४८ लाख ९१ हजार रुपैयाँमा प्रदर्शनीमा राखिएको छ । जीडब्लुएमको ओरा ५को मूल्य ४८ लाख ४१ हजार रुपैयाँबाट सुरु हुन्छ ।

त्यस्तै, लिपमोटर टी०३ ३२ लाख ९९ हजार, प्रोटोनको ईमास ७ ३२ लाख ९९ हजारदेखि ३६ लाख ९९ हजार र एमजी विन्ड्सर ३९ लाख ७५ हजार रुपैयाँमा उपलब्ध छन् ।

१८ देखि ३० लाखमा मध्यम वर्गको रोजाइमा बजेट इभी
एक्स्पोमा सबैभन्दा बढी आकर्षण कम मूल्यका साना र सिटी कारहरूमा देखिएको छ । १८ लाख ५० हजारदेखि ३० लाख रुपैयाँसम्मको सेगमेन्टमा आधा दर्जनभन्दा बढी मोडलहरू भिडिरहेका छन्।

एमजीको कोमेट इभी १८ लाख ७५ हजार रुपैयाँको सुरुवाती मूल्यमा दिएको छ । जसले कम बजेट खोज्ने ग्राहकलाई तानेको छ । त्यस्तै, हेनरी भोल्ट्सको दुई भेरियन्टमध्ये एउटाको मूल्य १८ लाख ५० हजार र अर्कोको २२ लाख ५० हजार रुपैयाँ रहेको छ ।

बोमा इभी २० लाख ९९ हजारदेखि २५ लाख ९९ हजार रुपैयाँसम्मको मूल्यमा उपलब्ध छ ।

विशाल ग्रुप अन्तर्गतको प्यारामाउन्ट मोटर्सले बुलिङको मिनी इभी १९ लाख ९९ हजार रुपैयाँमा सार्वजनिक गरेको छ । टाटा टियागोका दुई भेरियन्ट २८ लाख ९९ हजार र २९ लाख ९९ हजार रुपैयाँमा उपलब्ध छन् । न्यून बजेट भएकादेखि करोडौँ खर्च गर्न सक्ने प्रिमियम ग्राहकसम्मका लागि यो एक्स्पोले विकल्प नै विकल्प प्रदान गरेको छ ।