काठमाडौँ । टाटा मोटर्सको आधिकारिक बिक्रेता सिप्रदी ट्रेडिङले बहुप्रतिक्षित नयाँ पन्च ईभी फेसलिफ्ट मोडल नेपाली बजारमा सार्वजनिक गरेको छ ।

भृकुटीमण्डपमा जारी नाइमा नेपाल मोबिलिटी एक्स्पो २०२६ को अवसर पारेर कम्पनीले यस अत्याधुनिक विद्युतीय गाडीको बिक्री सुरु गरेको हो ।

एक्स्पोलाई लक्षित गर्दै कम्पनीले नयाँ पन्च ईभीमा विशेष ’इन्ट्रडक्टरी अफर’ सार्वजनिक गरेको छ । जसअन्तर्गत ग्राहकले यो प्रिमियम ईभी मात्र ३२ लाख ९९ हजार रुपैयाँमा खरिद गर्न सक्नेछन् ।
यो मूल्य अघिल्लो संस्करणको तुलनामा करिब ४ लाख रुपैयाँले कम हो, जसले गर्दा एक्स्पोमा टाटाको स्टलमा ग्राहकको आकर्षण निकै बढेको छ ।

के छन् नयाँ विशेषता ?
नयाँ पन्च ईभी फेसलिफ्टमा ब्याट्री क्षमतालाई अझ परिष्कृत गरिएको छ । यसमा ३० किलोवाट आवर र ४० किलोवाट आवर गरी दुईवटा ब्याट्री विकल्प उपलब्ध छन् । अघिल्लो मोडलको तुलनामा यसमा ५ किलोवाट आवर बढी क्षमता थपिएकाले यसले लामो दूरी (रेन्ज) तय गर्ने सुनिश्चितता प्रदान गर्दछ ।

चार्जिङ प्रविधिका हिसाबले यो गाडी निकै अगाडि छ । ६५ किलोवाटको डीसी फास्ट चार्जर प्रयोग गर्दा यसलाई २० देखि ८० प्रतिशतसम्म चार्ज गर्न मात्र २६ मिनेट लाग्छ । कम्पनीका अनुसार मात्र १५ मिनेट चार्ज गर्दा पनि १३५ किलोमिटरसम्मको यात्रा तय गर्न सकिन्छ ।

आधुनिक डिजाइन र प्रिमियम फिचर्स
गाडीको बाहिरी बनावटमा १६ इन्चका एरो–अप्टिमाइज्ड एलोय ह्वील र नयाँ डिजाइनका एलईडी टेललाइटले यसलाई थप स्पोर्टी र आधुनिक देखाएको छ । भित्री भागमा दोहोरो रङको थिमसँगै १०.२५ इन्चको विशाल टचस्क्रिन र उस्तै साइजको डिजिटल ड्राइभर डिस्प्ले दिइएको छ ।
आरामदायी यात्राका लागि यसमा वायरलेस चार्जिङ, भेन्टिलेटेड सिट, एम्बियन्ट लाइट, कनेक्टेड कार टेक्नोलोजी र ३६० डिग्री क्यामेरा जस्ता विलासी सुविधाहरू छन् ।

सुरक्षामा उच्च प्राथमिकता
सुरक्षाका दृष्टिकोणले टाटाले यस मोडलमा कुनै सम्झौता गरेको छैन। नयाँ पन्च ईभीमा ६ वटा एयरब्याग, इलेक्ट्रोनिक स्टेबिलिटी कन्ट्रोल, हिल होल्ड असिस्ट, टायर प्रेसर मनिटरिङ सिस्टम र आईएसओफिक्स चाइल्ड सिट माउन्ट जस्ता फिचरहरू मानकका रूपमा उपलब्ध छन् ।
अघिल्लो मोडलको मूल्य ३७ लाख ९९ हजारदेखि ३९ लाख ९९ हजार रुपैयाँसम्म रहेकोमा नयाँ फेसलिफ्ट मोडल सस्तो मूल्यमा उपलब्ध हुनु नै यसको मुख्य प्रतिस्पर्धात्मक लाभ बनेको छ ।