मुगु । मुगु जिल्ला अदालतले आर्थिक वर्ष २०८२/०८३ को असार २२ गते सम्म परेका १०१ एक बिभिन्न मुद्दामध्य ८० मुद्दा फछ्र्यौट भएका छन । कार्यालयको बार्षिक लक्ष्य अनुसार ८१.६३ प्रतिशत उपलब्धि हासिल गरेको छ ।

जिल्ला अदालत मुगुका अनुसार जिम्मेवारी सरेका र नयाँ दर्ता भएका गरी जम्मा १०१ मुद्दा मध्ये ८० मुद्दा फछ्र्यौट भएका छन् भने २१ मुद्दा बाँकी रहेका छन् । जम्मा लगतका आधारमा फछ्र्यौट ७९.२१ प्रतिशत रहेको छ ।

अदालतको तथ्याङ्क अनुसार यस आर्थिक वर्षमा अघिल्लो वर्षबाट ३२ मुद्दा जिम्मेवारी सरेका थिए भने ६९ नयाँ मुद्दा दर्ता भएका छन् । पछिल्ला तीन आर्थिक वर्षको तुलनामा अदालतको कार्यसम्पादनमा सुधार देखिएको र आर्थिक वर्ष २०८०/०८१ मा ९५ मुद्दामध्ये ५३ मुद्दा फछ्र्यौट भएको थियो भने आर्थिक वर्ष २०८१/०८२ मा १३४ मध्ये ९० मुद्दा टुंग्याइएको थियो। चालु आर्थिक वर्षमा बाँकी मुद्दाको संख्या घटेर २१ मा सीमित भएको अदालतले जनाकारी दिएको छ ।

मार्ग समूहका आधारमा हेर्दा सरल समूहका १५ मध्ये ८, सामान्य समूहका ८५ मध्ये ७१ तथा विशेष समूहको १ मुद्दा शतप्रतिशत फछ्र्यौट भएको छ ।

विषयगत मुद्दामध्ये सम्बन्ध विच्छेद, जबरजस्ती करणी, बैंकिङ कसुर, लागू औषध, बहुविवाह, अभद्र व्यवहार तथा घरेलु हिंसासम्बन्धी मुद्दाको सुनुवाइ जारी रहेको अदालतले जनाएको छ । बालबालिका प्रतिवादी भएका ९ मुद्दामध्ये ६ फछ्र्यौट भई ३ बाँकी रहेका छन् ।

कैद तथा जरिवाना कार्यान्वयन तर्फ २० निवेदन मध्ये १३ फछ्र्यौट भएका छन् । कैदतर्फ ५५.४३ प्रतिशत प्रगति भएको छ भने जरिवाना असुलीको प्रगति १८.३८ प्रतिशत रहेको अदालतको तथ्याङ्कमा उल्लेख छ ।

मुगु जिल्ला अदालतका निमित्त स्रेस्तेदार प्रेमराज खनियाका अनुसार, अदालतले सेवा प्रवाहमा केही चुनौतीहरू पनि रहेको समेत बताएका छन ।

परीक्षणका लागि पठाइएका भौतिक प्रमाणको प्रतिवेदन समयमै प्राप्त नहुनु, फरार प्रतिवादीको ठेगाना स्पष्ट नहुनु, म्याद पुर्जी समयमा तामेल नहुनु, आदेश कार्यान्वयनमा सम्बन्धित निकायबाट ढिलाइ, साक्षी समयमै उपस्थित नहुनु, विद्युत आपूर्तिको समस्या जस्ता कारणले मुद्दा फछ्र्यौट असर परेको र चुनौतीका बाबजुद अदालतले समयमै न्याय सम्पादन गर्ने उद्देश्यका साथ कार्यसम्पादनलाई प्रभावकारी बनाउँदै आएको उनले बताए ।