काठमाडौं । कुमारी बैंक लिमिटेड र बी एण्ड बी अस्पताल प्रा.लि., ग्वार्को–ललितपुरबीच बैंकका ग्राहकहरूलाई स्वास्थ्य सेवामा विशेष छुट उपलब्ध गराउने सम्बन्धी सम्झौता भएको छ।

सम्झौताअनुसार कुमारी बैंकका ग्राहकहरूले बी एण्ड बी अस्पतालबाट प्रदान गरिने इनपेसन्ट, आउटपेसन्ट, आकस्मिक सेवा तथा औषधि खरिदमा अधिकतम १० प्रतिशतसम्म छुट प्राप्त गर्नेछन्।

बैंकले ग्राहकहरूको स्वास्थ्य सुरक्षालाई संस्थागत जिम्मेवारीका रूपमा लिँदै गुणस्तरीय स्वास्थ्य सेवामा सहज पहुँच सुनिश्चित गर्न देश तथा विदेशका विभिन्न प्रतिष्ठित अस्पतालहरूसँग यस्ता सहकार्य गर्दै आएको जनाएको छ। यस सम्झौताले पनि बैंकका ग्राहकहरूलाई स्वास्थ्य सेवा उपयोग गर्दा थप राहत पुग्ने विश्वास गरिएको छ।

विगत २५ वर्षदेखि बैंकिङ सेवा प्रदान गर्दै आएको कुमारी बैंकले हाल देशभर २८६ शाखा, ३०४ एटीएम, ४१ एक्सटेन्सन काउन्टर तथा ४८ शाखारहित बैंकिङ इकाइमार्फत सेवा दिँदै आएको छ।

बैंकले बदलिँदो समय र ग्राहकको आवश्यकतालाई ध्यानमा राख्दै सेवा विस्तार तथा गुणस्तर अभिवृद्धिमा निरन्तर काम गरिरहेको उल्लेख गर्दै आगामी दिनमा थप सुलभ, प्रभावकारी र ग्राहकमैत्री सेवा उपलब्ध गराउने प्रतिबद्धता व्यक्त गरेको छ।