काठमाडौं । राष्ट्रिय स्वतन्त्र पार्टी (रास्वपा) की सांसद रचना खतिवडाले ७६ जना सहिद परिवारको न्यायको माग गर्दै सरकारको ध्यानाकर्षण गराएकी छिन् । सोमबार आयोजित एक कार्यक्रममा बोल्दै सांसद खतिवडाले न्यायको खोजीमा सहिद परिवारहरू ६–७ महिनादेखि सडकमा संघर्ष गरिरहेको बताइन् ।

“न्यायको लागि हामीले कहिलेसम्म सडकमा लड्नुपर्ने हो ?” उनले प्रश्न गरिन् । खतिवडाले ७६ जनामध्ये एकजना मात्र संसदमा रहेको र बाँकी ७५ जना अझै पनि सडकमा न्यायको लागि आवाज उठाइरहेको उल्लेख गरिन् ।

आफ्ना मागहरू लिएर मन्त्रीहरूको कार्यकक्षमा जाँदा समेत ढोकामा रहेका गार्डहरूबाट दुर्व्यवहार भोग्नुपरेको प्रति उनले खेद प्रकट गरिन् । खतिवडाले मन्त्रीहरूलाई लक्षित गर्दै भनिन्, “सहिद परिवारले न्याय कहिले पाउने हो ? उनीहरू न्यायको लागि सडकमा नै जानुपर्ने हो कि यहाँबाट (सदन/सरकार) न्याय पाउने हुन् ?”

सांसद खतिवडाले विगत लामो समयदेखि सडकमै रहेर आफूले पनि संघर्ष गरेको स्मरण गर्दै सहिद परिवारको पीडालाई सरकारले गम्भीरतापूर्वक लिनुपर्नेमा जोड दिइन् । उनले सहिद परिवारको प्रश्नको उत्तर दिन र उनीहरूलाई सडकबाट न्यायको अनुभूति दिलाउन सरकारसँग माग गरेकी छिन् ।