विराटनगर । कर्जा सुरक्षण कोष र फरवार्ड माइक्रोफाइनान्स लघुवित्त वित्तीय संस्था लिमिटेडबीच लघु कर्जा अतिरिक्त सुरक्षण योजना, २०८२ अनुसार कर्जा सुरक्षणसम्बन्धी महत्वपूर्ण सम्झौता भएको छ।

सुनसरीको दुहवीमा आयोजित कार्यक्रममार्फत २०८२ मंसिर १२ गते दुबै संस्थाका प्रमुख कार्यकारी अधिकृतहरूले सम्झौतापत्रमा हस्ताक्षर गरेका हुन्। कार्यक्रममा फरवार्ड लघुवित्तका नायब प्रमुख कार्यकारी अधिकृत, विभागीय प्रमुख तथा शाखा कार्यालयका कर्मचारीहरू तथा कोषका विभागीय प्रबन्धकहरू उपस्थित थिए।

यस सम्झौतापछी फरवार्ड लघुवित्तले प्रवाह गरेका कर्जामा अब विशेष सुरक्षण सुविधा लागू हुनेछ। कोषका अनुसार ‘विलफुल डिफल्ट’ का घटनामा ७५ प्रतिशतसम्म, र ऋणी वा पति/पत्नीको मृत्यु, अशक्तता तथा परीयोजना नष्टजस्ता परिस्थितिजन्य कारणले कर्जा असुल नहुने अवस्थामा १०० प्रतिशत दाबी भुक्तानी कोषले गर्नेछ।

योजनामा सहभागी हुने फारवार्ड लघुवित्तले नियमित ०.४ प्रतिशत वार्षिक सुरक्षण शुल्कमा थप ०.१५ प्रतिशतसहित ०.५५ प्रतिशत शुल्क तिर्नुपर्ने व्यवस्था छ। यसका माध्यमबाट विपन्न वर्गका व्यक्तिलाई साना तथा लघु उद्यम सञ्चालनका लागि प्रदान गरिने कर्जा पूर्णरूपमा सुरक्षित हुनेछ।