काठमाडौं । नेपाल राष्ट्र बैंकले तिहार लक्षित गर्दै आजदेखि चाँदीका सिक्का बिक्री गर्ने भएको छ । राष्ट्र बैंक टक्सार महाशाखाले बिहीबार सूचना प्रकाशित गर्दै आजदेखि चाँदीको सिक्का बिक्री गर्ने जनाएको हो ।

विशेष गरी नेपालीहरूको दशै पछिको दोस्रो ठुलो पर्व तिहारमा धनतेरसको दिन सुन, चाँदीजस्ता बहुमूल्य धातुको असर्फी तथा सिक्का किन्ने चलन छ । यसपटक सुनको असर्फी अभाव रहेकाले कार्तिक १३ गते एकदिन मात्रै बिक्री खुला गर्न लागेको राष्ट्र बैंकले जनाएको छ ।

‘सुनको असर्फी २.५ ग्राम प्रतिव्यक्ति एक थानका दरले ‘फर्स्ट कम फर्स्ट सर्भिसका आधारमा कार्तिक १३ गते एकदिन मात्र बिहान ११ बजेदेखि मौज्दात कायम रहेमा मध्याह्न ४ बजेसम्म बिक्री गरिने छ,’ राष्ट्र बैंकको सूचनामा छ ।

चाँदीको स्मारिका तथा मेडालियन भने ११ कात्तिकदेखि १४ कात्तिकसम्म बिक्री हुने राष्ट्र बैंकले जनाएको छ । ११ बजेदेखि मध्याह्न ४ बजेसम्म प्रतिव्यक्ति बढीमा ५ थानसम्म बिक्री हुने राष्ट्र बैंकले जनाएको छ । चाँदीको मेडालियन भने गाई अंकित २५ ग्राम, गाई अंकित १० ग्राम, लक्ष्मी अंकित १० ग्राम, गणेश अंकित १० ग्राम र गजलक्ष्मी अंकित १० ग्राम मध्येबाट बिक्री हुने राष्ट्र बैंकले जनाएको छ ।

असर्फी, चाँदीका स्मारिका र मेडालियन खरिदका लागि अनिवार्य सक्कल नागरिकता वा परिचय खुल्ने प्रमाण र त्यसको प्रतिलिपि सहित उपस्थित हुनुपर्ने राष्ट्र बैंकको भनाइ छ । असर्फी तथा मेडालियन खरिद गर्न नगद तथा क्यूआर मार्फत समेत भुक्तानी गर्न सकिने छ ।