काठमाडौँ । चालु आर्थिक वर्षको तेस्रो त्रैमाससम्म आइपुग्दा युनिभर्सल पावर कम्पनीको नाफा ५६.५७ प्रतिशतले घटेको छ । गत आर्थिक वर्षको तेस्रो त्रैमाससम्म आउँदा ४ करोड २३ लाख रुपैयाँ नाफा कमाएकोमा चालु आर्थिक वर्षको समिक्षा आवधिमा यस्तो नाफा घटेर १ करोड ८४ लाख रुपैयाँमा झरेको हो ।

कम्पनीको अन्य स्रोतबाट हुने आम्दानी घटेसँगै नाफामा गिरावट आएको देखिन्छ । गत वर्ष ६ करोड २० लाख रुपैयाँ अन्य स्रोतबाट आम्दानी गरेको कम्पनीको यो त्रैमासमा घटेर २ करोड ८१ लाख रुपैयाँमा झरेको छ ।

युनिभर्सल पावरले अझै विद्युत उत्पादन गर्न भने सकेको छैन । कम्पनीका अनुसार कम्पनीको हालसम्म निर्माण कार्य नै ९८प्रतिशत मात्रै सकिएको छ । यसअघि निर्धारित योजना अनुसार काम सम्पन्न हुन नसक्नुमा २०७७ सालमा खारे खोलामा आएको बाढी लगायतका अन्य कारण रहेका छन् । बाढीका कारण आयोजनाको ट्रान्समिसन लाइन, इलेक्ट्रो मेकानिकलको निर्माण कार्यपूर्व योजना बमोजिम हुन नसकेको कम्पनीको भनाइ छ । हाल यस जलविद्युत आयोजना निर्माणाधीन अवस्थामा छ ।

हाल यसको चुक्ता पुँजी २ अर्ब १० करोड रुपैयाँ रहेको छ भने जगेडा कोषमा ११ करोड ९२ लाख रुपैयाँ छ । चैत मसान्तसम्ममा कम्पनीको प्रतिसेयर आम्दानी १ रुपैयाँ १७ पैसा (वार्षिक) र प्रतिसेयर नेटवर्थ १०५ रुपैयाँ ६८ पैसा रहेको छ ।

यसले दोलखा जिल्लामा अवस्थित खारे खोलामा निर्माण गरिरहेको ११ मेगावाट जलविद्युत आयोजना अन्तिम चरणमा पुगेको छ । त्यसैगरी, कम्पनीले माथिल्लो इङ्खु खोला जलविद्युत आयोजनाको पनि अध्ययन गरिरहेको छ । यस्तै, ४५ मेगावाटको कसुवा खोला जलविद्युत आयोजना निर्माण गर्न लगानी सम्झौता गरिसकेको छ ।

२०७८ वैशाख ३१ गते प्रकाशित